რუსთავის მე-12 პენიტენციურ დაწესებულებასთან “ნაციონალური მოძრაობისა” და მათი მხარდამჭერების აქცია დაიწყო. აქციაზე მყოფი მოქალაქეები მესამე პრეზიდენტის, მიხეილ სააკაშვილის მრავალპროფილურ კლინიკაში გადაყვანას ითხოვენ, სადაც პრეზიდენტის ჯანმრთელობის მდგომარეობის შესასწავლად შესაბამისი პირობები იქნება უზრუნველყოფილი.

აქცია, რომელიც 17:00 საათზე უნდა დაწყებულიყო, რამდენიმე საათის დაგვიანებით დაიწყო. ამის მიზეზად “ნაციონალური მოძრაობის” ერთ-ერთმა ლიდერმა ზაალ უდუმაშვილმა დაასახელა ის, რომ სცენის აპარატურა, რომელიც აქციისთვის იყო ადგილზე მიტანილი, აქციის დაწყებამდე სამართალდამცველებმა წაიღეს და მოგვიანებით დააბრუნეს. ამასთან, მისი თქმით, ერთ-ერთი მოქალაქე შეუძლოდ გახდა, რამაც ასევე დააგვიანა აქციის დაწყება.

როგორც უდუმაშვილმა აქციაზე სიტყვით გამოსვლისას განაცხადა, დღეს ქართველ ხალხს ყველაზე მთავარს - თავისუფლებას ართმევენ.

„დღეს, თითოეული ჩვენგანი ვართ ამ ქვეყნის ჯარისკაცები. თითოეული ჩვენგანის ვალდებულებაა, რომ ვიდგეთ იქ, სადაც ისტორიის ნათელი მხარეა. ისტორიის ნათელი მხარე არის აქ, იქნება თბილისში, იქნება ზუგდიდში, იქნება ბათუმში, ყველგან, სადაც პროტესტის ხმა ისმის იმიტომ, რომ დღეს არ არის დრო ტელევიზორთან ვისხდეთ და ისე ვუყურებდეთ მოვლენებს რა ხდება ქვეყანაში. არჩევნები წაგვართვეს, ქვეყანას გვართმევენ, მესამე პრეზიდენტს გვართმევენ - დავთმობთ ჩვენ ამ ყველაფერს?“ - მიმართა უდუმაშვილმა აქციაზე შეკრებილ საზოგადოებას, რომლისგანაც პასუხად მიიღო - „არა“!

„მაშინ თითოეული ადამიანი უნდა გამოვიდეს გარეთ, უნდა დავუმტკიცოთ ერთმანეთს, რომ ამ ქვეყნის შვილები ვართ, რომ ძარღვებში სისხლი გვიჩქეფს. საქართველო ყოველთვის ებრძოდა ტირანიებს, რომლებიც ცდილობდნენ მისთვის თავისუფლება შეეზღუდათ. დღეს ჩვენ გვართმევენ ყველაზე ძვირფასს - თავისუფლებას! ჩვენ ვართ თავისუფლებისმოყვარე ერი. გაუმარჯოს თავისუფლებას! გაუმარჯოს მიხეილ სააკაშვილს! ერთმანეთს და ყველაზე თავისუფალ პატიმარს მივცეთ პირობა, რომ პუტინის პირადი პატიმარი არ იჯდება ქართულ ციხეში, ის აუცილებლად გათავისუფლდება. ჩვენ ერთად გამოვიყვანთ ქვეყანას სინელიდან, რომელშიც ივანიშვილმა ჩააგდო. თავისუფლება მიშას! რიგგარეშე არჩევნები!“ - განაცხადა უდუმაშვილმა.

აქციაზე მოქალაქეებს უჭირავთ ბანერები წარწერებით: ”თავისუფლება მიშას”, “თავისუფლება სამშობლოს მშენებელ სააკაშვილს”. ასევე, ისმის შეძახილები: “მიშა, მიშა”.

ამასთან, რუსთავის ციხის მიმდებარე ტერიტორიაზე ტრანსპორტის მოძრაობა შეზღუდულია. პატრულმა გზა აქციის დაწყებამდე გადაკეტა.

რუსთავში #12-ე პენიტენციურ დაწესებულებასთან აქტივისტებმა კარვები გაშალეს. როგორც ისინი აცხადებენ, საპატიმროსთან ბევრი ადამიანი აპირებს დარჩენას და კარვებიც იმისთვის არის გაშლილი, რომ მათი აქ დარჩენა იყოს უზრუნველყოფილი.

აქტივისტების განცხაებით, კარვებში დარჩებიან, ვიდრე მიზანს არ მიაღწევენ და საქართველოს მესამე პრეზიდენტს მულტიფუნქციურ კლინიკაში არ გადაიყვანენ

შეგახსენებთ, მიხეილ სააკაშვილი პირველ ოქტომბერს დააკავეს, ის ციხეში პროტესტის ნიშნად უკვე 37-ე დღეა შიმშილობს.

წყარო: ინტერპრესნიუსი