პარლამენტის შიგნით ჩვენ დავიწყებთ ყველა პროცედურის ჩატარებას, რათა უზრუნველვყოთ ხელისუფლების სახლში სწრაფად გასტუმრება, - ამის შესახებ ფრაქცია „ლელო - პარტნიორობა საქართველოსთვის“ წევრმა სალომე სამადაშვილმა ჟურნალისტებთან განაცხადა.
მისი თქმით, სანამ ხელისუფლების შეცვლის პროცესი არ დაიწყება, ფრაქცია „ლელო - პარტნიორობა საქართველოსთვის” სხვა საკითხებზე პარლამენტში მსჯელობას არ აპირებს.
„ჩვენ პარლამენტში ვაყენებთ ერთადერთ საკითხს, რომ ჩვენ უნდა დავიწყოთ ამ ხელისუფლების შეცვლის პროცესი, მათ შორის პარლამენტში მთავრობისთვის უნდობლობის გამოცხადების პროცედურით, სანამ ჩვენ არ დავიწყებთ ამ პროცესს, არანაირ სხვა საკითხებზე ჩვენ არ ვაპირებთ პარლამენტში მსჯელობას. ეს ხელისუფლება უნდა გავისტუმროთ სახლში ვადამდელი არჩევნებით, ყველა შესაბამის პროცედურას მივმართავთ. თქვენ იცით, რომ არსებობს როგორც იმპიჩმენტის პროცედურა, ასევე მთავრობისთვის უნდობლობის გამოცხადების პროცედურა.
საზოგადოების ძალიან მწვავე პროტესტი ცხადია უნდა გაგრძელდეს, მე იმედი მაქვს, რომ დღეს 6 საათზე პარლამენტის წინ ძალიან ბევრი ადამიანი შეიკრიბება, ჩვენ, რა თქმა უნდა, ვიქნებით ამ პროტესტის წარმომადგენლები. პარლამენტის შიგნით ჩვენ დავიწყებთ ყველა პროცედურას იმისთვის, რომ სწრაფად უზრუნველვყოთ ამ ხელისუფლების სახლში გასტუმრება, იმიტომ, რომ ასე ქვეყანა არსებობას ვერ გააგრძელებს”, - განაცხადა სამადაშვილმა.
IPN.GE