„ქართული ოცნების“ დღის წესრიგია შელახოს ყველა დამოუკიდებელი აქტორის რეპუტაცია, - ასე ეხმიანება ფრაქციის „ლელო - პარტნიორობა საქართველოსთვის“ დეპუტატი სალომე სამადაშვილი არასამთავრობო სექტორზე „ქართული ოცნების“ თავმჯდომარის, ირაკლი კობახიძის მიერ გაკეთებულ განცხადებას.

სამადაშვილის თქმით, არასამთავრობო სექტორზე თავდასხმა „ქართული ოცნებისგან“ გასაკვირი არ არის.

„სასოწარკვეთილებაში ჩავარდნილი გაკოტრებული „ქართული ოცნება“ დღეს შიშვლად წარდგა საერთაშორისო თანამეგობრობის და საზოგადოების წინაშე, როგორც პოლიტიკური ძალა, რომელიც ტერორის გზით აპირებს შეინარჩუნოს ძალაუფლება, მათი პოლიტიკური დღის წესრიგია ყველა დამოუკიდებელი პოლიტიკური თუ საზოგადოებრივი აქტორი ქვეყანაში დააკავშიროს პოლიტიკურ ოპოზიციასთან და ამით შელახონ მათი დამოუკიდებელი რეპუტაცია, რადგან დამოუკიდებლობა არის სახიფათო რუსული ოლიგარქიული რეჟიმისთვის და მათი წარმომადგენლებისთვის, როგორიც არის ბატონი კობახიძე. ამიტომ არ გვიკვირს თავდასხმა არასამთავრობო ორგანიზაციებზე, ეს არის ის გზა, როგორითაც მოქმედებს რუსეთის ხელისუფლება და იგივე ტექნოლოგიებით როგორც პუტინის რეჟიმი და ჩემთვის გასაკვირი არ არის, რომ ის თავს ესხმის დამოუკიდებელ არასამთავრობო ორგანიზაციებს,“ - განაცხადა სამადაშვილმა.

ცნობისათვის, არასამთავრობო ორგანიზაცია საია-ს სარჩელთან დაკავშირებით, რომელიც საარჩევნო ოლქების დადგენილ საზღვრებს ეხება, ირაკლი კობახიძემ განაცხადა, რომ ის, რაც 5 წლის წინ „ნაციონალურმა მოძრაობამ“ ღიად განახორციელა, ახლა არასამთავრობო ორგანიზაციის სახელით კეთდება.

ipn.ge