საქართველოს ფუფუნება არ აქვს კანდიდატის სტატუსზე მეორე „არა“ მიიღოს, - ამის შესახებ საქართველოს პრეზიდენტმა სალომე ზურაბიშვილმა Oxford Union-ში სიტყვით გამოსვლისას განაცხადა.
საქართველოს პრეზიდენტის თქმით, ის ერთ-ერთი კრიტიკოსია ქვეყანაში რეფორმების ნაკლებობის კუთხით და ქვეყანა უნაკლო არ არის, მაგრამ ამავე დროს საქართველოს არ აქვს ფუფუნება, რომ ევროკავშირის წევრობის კანდიდატის სტატუსზე მეორე „არა“ მიიღოს.
„ჩვენ არ მივიღეთ კანდიდატის სტატუსი, რომელიც ჩვენი ასოცირებული ტრიოს დანარჩენმა ორმა მეგობარმა და პარტნიორმა მიიღო. ამან, რა თქმა უნდა, საქართველოს მოსახლეობაში გარკვეული ფორმის იმედგაცრუება გააჩინა, რადგან გვესმოდა, რომ ტექნიკური თვალსაზრისით ჩვენ, შესაძლოა, უფრო შორს წავედით ევროინტეგრაციის გზაზე მიღებული კანონმდებლობის, შიდა რეფორმების თვალსაზრისით, რომლების ამ ევროინტეგრაციის გზაზე მოგზაურობის 30 წლის განმავლობაში იქნა მიღებული.
გვესმის ის ფაქტი, რომ ჩვენი ევროპული პერსპექტივა და ორი დანარჩენი ქვეყნის კანდიდატის სტატუსი არსებითად იმ ბრძოლის წყალობით მოხდა, რომელსაც უკრაინული მოსახლეობა აწარმოებს. ამ მხრივ გარკვეული პოლიტიკური მიზეზი იყო იმ ფაქტის მიღმა, რომ სამხედრო საფრთხის ქვეშ ყველაზე მეტად მყოფმა ორმა სახელმწიფომ მიიღეს ეს აღიარება და საქართველო, რომელიც ამ დროს ასე პირდაპირ არ იყო სამხედრო საფრთხის ქვეშ, სხვა დამსახურებების მხრივ შეფასდა და იყო გარკვეული პოლიტიკური მიზეზები, რატომ იქნა ეს განსხვავება გაკეთებული…
მე ერთ-ერთი კრიტიკოსი ვარ შიდა რეფორმების ნაკლის ან სწრაფი მოძრაობის ნაკლებობის იმ მიმართულებებით, რითაც უნდა მივდიოდეთ წინ. ნათელია, რომ ჩვენ უნაკლოები არ ვართ, თუმცა ვფიქრობ, რომ საქართველოს ფუფუნება არ აქვს კანდიდატის სტატუსზე მეორე “არა” მიიღოს და რომ ჩვენ კანდიდატის სტატუსი რაც შეიძლება სწრაფად უნდა მივიღოთ, რადგან ეს რუსეთისთვის გაგზავნილი სტრატეგიული მესიჯია”, - თქვა სალომე ზურაბიშვილმა.