არასამთავრობო ორგანიზაცია „სამოქალაქო იდეამ“ მორიგი ანგარიში გამოაქვეყნა -  „ვინ განსაზღვრავს ცივი ომის შემდგომი მსოფლიოს დღის წესრიგს? ჩინეთის გავლენის ოპერაციები აკადემიაში, მედიასა & არასამთავრობო სექტორში - საქართველოს მაგალითი“

როგორც ანალიტიკური ორგანიზაცია „სამოქალაქო იდეის“ ხელმძღვანელი,  თავდაცვის ყოფილი მინისტრი თინათინ ხიდაშელი აცხადებს, საქართველოში ჩინეთის სახალხო რესპუბლიკის ძალის არაკონტროლირებადი და გაუწონასწორებელი ზრდა, საფრთხეს უქმნის, საქართველოს ეროვნული უსაფრთხოებასა და დემოკრატიულ განვითარებას.

„ანგარიშში გთავაზობთ აკადემიურ სფეროში, მედიასა და საქართველოს სამოქალაქო საზოგადოების ორგანიზაციებში, ჩინეთის სახალხო რესპუბლიკის პოლიტიკური გავლენების საკითხის კვლევას. აქ ნახავთ ფაქტებს და მტკიცებულებებს იმის შესახებ, რომ საქართველოს წამყვანი უნივერსიტეტები, 2018 წლიდან ინტენსიურად თანამშრომლობენ ჩინეთის ისეთ სასწავლო დაწესებულებებთან, რომლებიც უსაფრთხოების მაღალი რისკების გათვალისწინებით ყველაზე უფრო მაღალი რისკის მატარებელ ინსტიტუტებად არიან მიჩნეული თავდაცვისა და უსაფრთხოების სფეროში. მაგალითად, ეს ინსტიტუტები აშშ-ს კომერციის დეპარტამენტს შავ სიაში ჰყავს შეყვანილი. თავისთავად ის ფაქტი, რომ ქვეყანა ერთი მხრივ ნატოსკენ მიდის, ხოლო მეორეს მხრივ ჩინეთის სახალხო განმათავისუფლებელ არმიასთან აფელირებულ მაღალი რისკის ინსტიტუტებთან არის დაკავშირებული, სერიოზული რისკის მატარებელია,“ - განაცხადა თინათინ ხიდაშელმა. 

როგორც „სამოქალაქო იდეის“ ხელმძღვანელი აღნიშნავს,  ანგარიშში დასახელებულა ფაქტები და მტკიცებულებები იმის შესახებ, რომ ქვეყანაში არ არსებობს არავითარი წინასწარი შესწავლის დოკუმენტები, სუს-ის ანგარიში ან რაიმე სხვა, სადაც გაანალიზებულია ჩვენი პარტნიორი სახელმწიფოების მიერ შავ სიაში შეყვანილი, ან მაღალი რისკის მატარებელი დაწესებულებები თუ კომპანიები, რაც სარეკომენდაციო ხასიათის მაინც იქნებოდა საქართველოს ფიზიკური თუ იურიდიული პირებისთვის. შესაბამისად, სახელმწიფოს პრაქტიკულად სრულად აქვს მოხსნილი პასუხისმგებლობა უსაფრთხოების იმ რისკების მიმართ, რომელზეც დღეს მთელი ცივილიზებული მსოფლიო შეთანხმებულია.

„ამის კარგი მაგალითია კონფუცის ინსტიტუტები, რომლებიც ევროპის და ამერიკის უმაღლეს სასწავლებლებში ერთმანეთის მიყოლებით იხურება. ხოლო ჩვენთან აღმავლობის ფაზაშია, ასევე ჰუავეისა და სხვა ჩინური გიგანტი ტექნოლოგიების კომპანიების საქმიანობა, ტიკტოკი რომელის თაობაზეც საზოგადოების გაფრთხილებისა და ინფორმირების ნაცვლად ყოფილი პრემიერის, მისი ოჯახის წევრებისა და ხელისუფლების სხვა წარმომადგენლების აქტივობებს შეგიძლიათ ადევნოთ თვალი.“  

ხიდაშელის ვარაუდით, დღეს ჩინეთის საქმიანობა საქართველოში პირდაპირი, ხილული და მყისიერი საფრთხის შემცველი არ არის, თუმცა რესპექტაბელური და ავტორიტეტული ორგანიზაციების, ჩვენი პარტნიორი ქვეყნების უსაფრთხოების სამსახურების, ევროკავშირის მრავლობითი ორგანიზაციების კვლევების, რეკომენდაციებისა და გადაწყვეტილებების იგნორირება საქართველოს ხელისუფლების მხრიდან, კიდევ ერთი ნათელი მაგალითია მყარი საგარეო ორიენტირების მოშლისა და ქვეყნის განვითარების და გრძელვადიანი წარმატების შესახებ ბუნდოვანი ხედვის თაობაზე.

ორგანიზაცია „სამოქალაქო იდეა“ 2020 წლის შემოდგომაზე, კიდევ რამდენიმე ანგარიშის გამოქვეყნებას გეგმავს ჩინეთის გავლენებსა და ძალაზე. ასევე განიხილავენ კორუფციულად საშიში საქმეებს, სადაც ერთმნიშვნელოვნად ჩანს ქართული სახელმწიფოს სისუსტე და მყიფე ხასიათი.