რადიო „კომერსანტის“ დილის ეთერში ლევან კობერიძის საავტორო გადაცემაში „ბრენდი საქართველო“ გადაცემის წამყვანმა სტუმართან — საპენსიო ფონდის ყოფილ დირექტორთან ერთად საპენსიო სააგენტოს მნიშვნელობაზე და მის გარშემო არსებულ რისკებზე და დამოუკიდებელი მაკონტროლებელი მექანიზმის არსებობის აუცილებლობაზე ისაუბრა.
ლევან კობერიძის თქმით, ის პირადად იყო ჩართული კანონის მომზადებისა და მიღების პროცესში და ამაყობს, რომ ამ ინიციატივის ერთ-ერთი აქტიური მხარდამჭერია.
„როცა პარლამენტში ვიყავი, ორ კომიტეტში - ჯანდაცვის და სოციალურ საკითხთა და ეკონომიკურ საკითხთა კომიტეტებში, სწორედ ამ კანონზე ვმუშაობდით და ამაყი ვარ, რომ ამ კანონის მიღების და ფონდის შექმნის ერთ-ერთი აქტიური მხარდამჭერი, ინიციატორი და თანამონაწილე ვარ. საპენსიო ფონდში ჩართულობა ძალიან მნიშვნელოვანია როგორც მოქალაქეების, ისე ქვეყნისთვის“, - განაცხადა ლევან კობერიძემ.
მისი თქმით, ფონდი კანონითაა დაცული და მისი გარანტი სახელმწიფოა, მაგრამ ამასთან ერთად, ფონდის გარანტორი უნდა იყოს საზოგადოების, მედიის, პარლამენტის, პროფესიონალების სიფხიზლე, რომ მსგავსი ტიპის ფონდებთან დაკავშირებულ კანონმდებლობაში ცვლილებები არ მოხდეს.
ლევან კობერიძემ რადიო „კომერსანტის“ ეთერში საპენსიო ფონდში დამოუკიდებელი მაკონტროლებელი სტრუქტურული ერთეულის არსებობის აუცილებლობაზეც ისაუბრა. მისი თქმით, ამ მიმართულებით განსაკუთრებული სიფხიზლეა საჭირო.
„ყველა ჩემს კოლეგა პარლამენტარს ეთერიდან მოვუწოდებ, რომ ამასთან დაკავშირებით ფხიზლად იყვნენ. იმიტომ, რომ ეს არის თემა, რომელიც საქართველოს მოსახლეობას, 1, 300 000 კაცს, ეხება. ამ 1 300 000 კაცის ოჯახის წევრები რომ წარმოვიდგინოთ, ეს დაახლოებით საქართველოს მოსახლეობის 75% იქნება და პრაქტიკულად საპენსიო ფონდის რეფორმის წარმატებაზეა მიბმული საქართველოს მოსახლეობის 75%-ის განწყობები ქვეყანაში გრძელვადიან კეთილდღეობასთან და განვითარების პერსპექტივასთან დაკავშირებით“ - განაცხადა ლევან კობერიძემ.