ჩვენი სურვილი ისევ არის უკრაინაში ომის არ დაშვება, თუმცა ტენდენცია არის ძალიან ცუდი და შეიძლება შეუქცევადი ნეგატიური პროცესები მივიღოთ , - ამის შესახებ "ქართული ოცნების" თავმჯდომარემ ირაკლი კობახიძემ ჟურნალისტებთან უკრაინის საკითხზე საუბრისას განაცხადა.
ჟურნალისტის მიერ დასმულ კითხვაზე, უკრაინის პრეზიდენტი, ვლადიმერ ზელენსკი მოიაზრებს თუ არა საქართველოს საკუთარ განცხადებაში, რომლის თანახმადაც, მადლიერია ქვეყნების, რომლებიც გვერდში უდგანან უკრაინას სიტყვით, დეკლარაციებით, დახმარებით, თუმცა არ ჩამოთვლის მეგობარ ქვეყნებს სახელებით, რადგან არ უნდა ზოგიერთ ქვეყანას შერცხვეს, კობახიძე პასუხობს, რომ საქართველო არის ერთ-ერთი იშვიათი გამონაკლისი, რომელმაც უკრაინის მიმართ სოლიდარობა საპარლამენტო რეზოლუციის დონეზე გამოხატა.
"საქართველო არის ერთ-ერთი იშვიათი გამონაკლისი, რომელმაც საპარლამენტო რეზოლუციის დონეზე მხარდაჭერა და სოლიდარობა გამოხატა ჩვენი მეგობარი უკრაინელი ხალხის მიმართ. ჩვენი პოზიცია ამ თვალსაზრისით არის, რა თქმა უნდა, მკაფიო. სოლიდარობა უკრაინელი ხალხის მიმართ არის ძალიან მკაფიო და ჩვენი სურვილი ისევ და ისევ არის პირველ რიგში უკრაინაში ომის არ დაშვება, თუმცა ტენდენცია არის ძალიან ცუდი, ძალიან სამწუხარო და შეიძლება მივიღოთ შეუქცევადი ნეგატიური პროცესები. ჩვენ, რა თქმა უნდა, დავაკვირდებით მოვლენების განვითარებას და ამის მიხედვით გვექნება ჩვენი პოლიტიკური რეაქცია, სხვადასხვა განვითარების შემთხვევაში", - განაცხადა ირაკლი კობახიძემ.
შეგახსენებთ, უკრაინის პრეზიდენტმა ვლადიმერ ზელენსკიმ მიუნხენის უსაფრთხოების კონფერენციაზე განაცხადა, რომ მადლობელია იმ ქვეყნების, ვინც უკრაინას მხარში უდგას, თუმცა მან ქვეყნები არ ჩამოთვალა რადგან, მისი თქმით, არ უნდა ზოგიერთ ქვეყანას შერცხვეს.
"მადლიერი ვარ ქვეყნების, რომლებიც გვერდში უდგანან უკრაინას სიტყვით, მიღებული დეკლარაციებითა და კონკრეტული დახმარებით. არ ჩამოვთვლი ჩვენს მეგობარ ქვეყნებს სახელებით, რადგან არ მინდა ზოგიერთ ქვეყანას შერცხვეს", - განაცხადა ზელენსკიმ.
შეგახსენებთ, ,ნაციონალური მოძრაობის” წევრი ლევან ხაბეიშვილი მიუნხენის უსაფრთხოების კონფერენციაზე უკრაინის პრეზიდენტის ვლადიმერ ზელენსკის სიტყვით გამოსვლის შეფასებისას ამბობს, რომ რჩება შთაბეჭდილება, რომ ზელენსკის შემდეგი სუტყვები საქართველოსაც ეხება: "უკრაინა მადლიერია ქვეყნების, რომლებიც უკრაინას სიტყვით, მიღებული დეკლარაციებითა და კონკრეტული დახმარებით გვერდში უდგანან, თუმცა მეგობარ ქვეყნებს სახელებით არ ჩამოთვლის, რადგან არ უნდა, რომ ზოგიერთ ქვეყანას შერცხვეს."
მისივე თქმით, ამ ომს ცივილიზებული სამყარო მოიგებს, მაგრამ წააგებს საქართველო და ქართველი ხალხი იმიტომ, რომ ,,გვყავს რუსული რეჟიმი, რომელიც ჩვენი მეგობარი სახელმწიფოსთვის ღირსეული მხარდაჭერის გამოხატვას ვერ ბედავს.
,,ძალიან უხერხული და მძიმე საყურებელია ,,ქართული ოცნების” პოზიცია, რომელიც ჩირგვებშია დამალული მაშინ, როდესაც ჩვენს მეგობარ უკრაინას მხარდაჭერა სჭირდება. მთელი ცივილიზებული სამყარო დგას უკრაინის გვერდით, ნაცვლად იმისა, რომ რეალური მხარდაჭერა აღმოვუჩინოთ უკრაინას, რეზოლუციაში სიტყვა რუსეთსაც ვერ ახსენებენ. დარწმუნებული ვარ, რომ ამ ომს მოიგებს ცივილიზებული სამყარო, მაგრამ წააგებს საქართველო და ქართველი ხალხი იმიტომ, რომ გვყავს რუსული რეჟიმი, რომელიც ვერ ბედავს ჩვენი მეგობარი სახელმწიფოსთვის ღირსეული მხარდაჭერის გამოხატვას”, - აღნიშნა ლევან ხაბეიშვილმა.
ცნობისთვის, უკრაინის პრეზიდენტმა ვლადიმერ ზელენსკიმ მიუნხენის უსაფრთხოების კონფერნეციაზე სიტყვით გამოსვლისას განცხადა, რომ მადლიერია ქვეყნების, რომლებიც გვერდში უდგანან უკრაინას სიტყვით, დეკლარაციებით, დახმარებით და ჩამოთვლის მეგობარ ქვეყნებს სახელებით, რადგან არ სურს ზოგიერთ ქვეყანას შერცხვეს. მისი თქმით, ეს ამ ქვეყნების საქმე და მათი შეგნებაა, თუმცა გაუგებარია როგორ აუხსნიან ისინი ამ ყველაფერს კიევში მცხოვრებ სამ არასრულწლოვანს, რომლებმაც ცენტრალური ევროპის დროით დილის 6 საათზე ჩამოგდებული ჭურვის შედეგად მამა დაკარგეს.
წყარო: "ინტერპრესნიუსი"