უკრაინის ეროვნული უსაფრთხოების და თავდაცვის საბჭოს მდივანმა ოლექსი დანილოვმა რადიო თავისუფლების უკრაინულ სამსახურთან ინტერვიუში განაცხადა, რომ საქართველომ და მოლდოვამ უკრაინის მონაწილეობის გარეშე უნდა მოიშორონ რუსული ჯარების გავლენა და ყოფნა მათ ტერიტორიაზე.
„ეს ქართველები უნდა გააკეთონ, ეს უნდა გააკეთონ მოლდაველებმა. თუ მათ მიაჩნიათ, რომ ეს ტერიტორია უშუალოდ მათ ეკუთვნის,“- განაცხადა დანილოვმა.
მას მიაჩნია, რომ ქვეყნები, რომლებზეც რუსეთის ფედერაციას აქვს გავლენა და სადაც რუსეთის ფედერაცია იმყოფება, ვერ განვითარდებიან.
„მაგალითად მოლდოვა. რომელიც ოკუპირებულია რუსეთის ფედერაციის მიერ დიდი ხნის განმავლობაში. ჩვენ ვერ ვხედავთ, რომ ამ ტერიტორიას განვითარების პერსპექტივა ექნება, სანამ ის რუსი ოკუპანტისგან არ გათავისუფლდება. საქართველოს მაგალითი. 2008 წელს, როდესაც ეს ტერორისტები საქართველოს ტერიტორიაზე შევიდნენ, მოახდინეს საქართველოს ნაწილის ოკუპაცია - მსგავსი სიტუაციაა. ტერიტორია აბოსოლუტურად დანგრეულია ის ვერ ვითარდება და არ ექნება განვითარების პერსპექტივა, ვინაიდან ასეთ ტერიტორიებზე, სადაც ტერიტორიული საკითხი გაურკვეველია, ფულს არავინ ჩადებს“,- განაცხადა დანილოვმა.
ამასთან მან „უცნაური“ უწოდა საქართველოს პრეზიდენტის სალომე ზურაბიშვილის განცხადებას, რომ რუსეთის ფედერაციის უკრაინის წინააღმდეგ ომის დასრულების შესახებ სამშვიდობო შეთანხმებაში უნდა იყოს საქართველოს ტერიტორიიდან რუსული ჯარების გაყვანის შესახებ პუნქტი.
„მაშინ თქვით, რომ ეს არ არის ჩვენი ტერიტორია, მაგრამ თქვით ეს საჯაროდ მთელი მსოფლიოს გასაგონად. ეს ბიზანტიური სტილი, რომელიც პოლიტიკაში გარკვეულ დრომდე არსებობდა, წარსულს უნდა ჩაბარდეს“, - თქვა დანილოვმა.
საქართველოს პრეზიდენტმა სალომე ზურაბიშვილმა სააგენტო „ბლუმბერგთან“ საუბარში განაცხადა, რომ „რუსეთმა უნდა იცოდეს სად გადის მისის საზღვრები. საქართველოს საკითხები ასევე უნდა იყოს გათვალისწინებული და არავინ უნდა იფიქროს, რომ ეს ომი შესაძლოა დასრულდეს რუსეთის ყველა ოკუპირებული ტერიტორიიდან გასვლის გარეშე“,- თქვა სალომე ზურაბიშვილმა, რომლის თანახმადაც, წინააღმდეგ შემთხვევაში დასავლეთი კიდევ ერთ შეცდომას დაუშვეს, როგორც ეს 2008 და 2014 წლებში.