„მოვისმინეთ ევროკავშირის ლიდერებისგან, რომ დაჩქარებული წესით რომელიმე ქვეყნის მიღება ევროკავშირში არ იგეგმება“, - ამის შესახებ საქართველოს პრემიერ-მინისტრმა ირაკლი ღარიბაშვილმა პოლონეთის რესპუბლიკის პრემიერ-მინისტრ მათეუშ მორავიეცკისთან შეხვედრის შემდეგ ბათუმში ხუთშაბათს, 17 მარტს გამართულ ერთობლივ ბრიფინგზე განაცხადა. როგორც მთავრობის მეთაურმა აღნიშნა, საქართველოს ექნება პოლონეთის ძალიან დიდი მხარდაჭერა ევროინტეგრაციის გზაზე.

„შეხვედრაზე ვრცელი საუბარი გვქონდა საქართველოს ევროკავშირში გაწევრიანების შესახებ გაკეთებულ განაცხადზე. რაზეც ვიტყოდი, რომ მართლაც ისტორიული ნაბიჯია და ეს არის ქართველი ხალხის არჩევანი. ეს არ არის მხოლოდ ჩვენი, მთავრობის გადაწყვეტილება, ეს არის ჩვენი მოსახლეობის გადაწყვეტილება, ჩვენი ხალხის არჩევანი. რა თქმა უნდა პოლონეთი როგორც ჩვენი ერთგული მხარდამჭერი, მე მჯერა და მოვისმინე პრემიერმინისტრისგან, რომ საქართველოს ექნება პოლონეთის ძალიან დიდი მხარდაჭერა ევროინტეგრაციის გზაზე. ჩვენ კარგად გვესმის, რომ ესაა გრძელი გზა. ჩვენ გვჭირდება რეფორმების განხორციელება, მომზადება ჩვენი ქვეყნის, ეკონომიკის განვითარება, ბევრი პრობლემის დაძლევა იმისთვის, რომ ქვეყანა გახდეს ევროკავშირის წევრი. ჩვენ ასევე მოვისმინეთ ევროკავშირის ლიდერებისგან, რომ დაჩქარებული წესით, რომელიმე ქვეყნის მიღება ევროკავშირში არ იგეგმება, რომ ეს არის ხანგრძლივი პროცესი, მაგრამ ჩვენ ვართ აბსოლუტურად მოტივირებულები. ასოცირების შეთანხმებას, რომელსაც ხელი მოვაწერეთ ზედმიწევნით ვასრულებთ. მას შემდეგ ჩვენ გვქონდა კონკრეტული ხელშესახები შედეგები ევროინტეგრაციის გზაზე როგორიც არის თავისუფალი ვაჭრობა და უვიზო რეჟიმი, რომლითაც ჩვენი მოქალაქეები სარგებლობენ. ამ პროცესში კიდევ ერთხელ მინდა მადლობა გადავუხადო პოლონეთს, როგორც ჩვენს ერთგულ მეგობარს და გულმხურვალე მხარდამჭერს საქართველოს ევროინტეგრაციის“, - განაცხადა ირაკლი ღარიბაშვილმა.