მხოლოდ ბოლო 8 წლის განმავლობაში, ევროკავშირში თავშესაფარი საქართველოს 111 528-მა მოქალაქემ მოითხოვა. ანუ 33 ადამიანში ერთმა. 2022 წელს საქართველოს მოსახლეობა 3 700 000-ზე ოდნავ ნაკლები იყო.

ევროკავშირის სტატისტიკის სამსახურის, ევროსტატის მონაცემებით, სულ 2014 წლიდან მოყოლებული საქართველოდან 126 770 თავშესაფრის მოთხოვნა დარეგისტრირდა. ეს რიცხვი მოიცავს მათაც, ვინც ევროკავშირსა და შვეიცარიაში ლტოლვილად ჩაბარებას ხელმეორედ ეცადა.

თითქმის 26 ათასმა ადამიანმა თავშესაფარი 2022 წლის იანვარ-ნოემბერში მოითხოვა. დეკემბრის მონაცემები ჯერ არ გამოქვეყნებულა, მაგრამ ეს უკვე იმაზე ბევრად მეტია, ვიდრე ნებისმიერ სხვა წელს. წინა რეკორდი პანდემიამდელ 2019 წელს დამყარდა, როცა ლტოლვილობა 22 110-მა ადამიანმა გადაწყვიტა.

მას შემდეგ, რაც ევროკავშირის ქვეყნებმა საკარანტინო შეზღუდვები გააუქმეს და საზღვრები გახსნეს, თავშესაფრის მსურველთა რიცხვი სწრაფად მატულობს. ბოლოს ჩაბარების 1000-ზე ნაკლები მოთხოვნა ევროკავშირმა საქართველოს მოქალაქეებისგან 2021 წლის მაისში მიიღო - 910. რეკორდული თვე 2022 წლის ნოემბერია - 2805 მსურველი.

ყველაზე ხშირად საქართველოს მოქალაქეები თავშესაფარს საფრანგეთსა და გერმანიას სთხოვენ. ბოლო 8 წელიწადში საფრანგეთში ლტოლვილად ჩაბარება თითქმის 36 ათასმა ადამიანმა სცადა, გერმანიაში კი - 33 ათასმა. ეს გაცილებით მეტია, ვიდრე ნებისმიერ სხვა ქვეყანაში. მესამე ადგილზე მყოფ იტალიაში დარჩენა 7695 ადამიანს უნდოდა. მას, ჩაბარების 6730 მსურველით, საბერძნეთი მოსდევს.

წყარო: რადიო თავისუფლება