პრემიერ-მინისტრ ირაკლი ღარიბაშვილის განცხადებით, სავალდებულო სამხედრო სამსახურთან დაკავშირებით მნიშვნელოვანი რეფორმებია დაგეგმილი, მისი თქმით, აქამდე სისტემა არ იყო ისეთი ეფექტური, როგორიც საჭიროა.

„დღეს თავდაცვის კოდექსს განვიხილავთ მთავრობის სხდომაზე, ბატონმა ჯუანშერმა წარმოადგინა აღნიშნული კანონპროექტი. ეს არის ერთ-ერთ საოცნებო საკითხი პირადად ჩემთვის და ჩვენთვის ყველასთვის, იმიტომ, რომ ეს უკავშირდება ჩვენს მომავალ თაობას, ჩვენი ახალგაზრდების აღზრდას, მათში პატრიოტული, ეროვნული სულისკვეთების ამაღლებას, გაძლიერებას და დამატებითი მოტივაციის მიცემას. ძალიან მოკლედ გეტყვით, რას გულისხმობს აღნიშნული კოდექსი. დიდი ხანია მიმდინარეობდა მუშაობა. დეტალურად შევისწავლეთ უცხო ქვეყნების გამოცდილებაც, მათ შორის საუკეთესო პრაქტიკები დავამუშავეთ. აღნიშნული კოდექსი ძალიან დიდი სიახლე იქნება და რეალურად, ძალიან მნიშვნელოვანი რეფორმები დაიწყება თავდაცვის უწყებაში.

პირველი ხედვა, რაც მინდა მოკლედ გითხრათ, ეს არის შემდეგი, რომ სავალდებულო სამხედრო სამსახური გადაიხედა, მოხდება ამის რეფორმირება და ყველა პირი, მოქალაქეები გაივლიან სავალდებულო სამხედრო სამსახურს მხოლოდ თავდაცვის უწყებაში. მოგეხსენებათ, მანამდე გაფანტული იყო ეს სამსახური და უნდა ვაღიაროთ, არ იყო ეფექტური. ყველა ანალიზის მიხედვით, ეს სამსახური არ იყო ეფექტური და არ იძლეოდა იმ შედეგს, რომელიც ჩვენ გვინდა, რომ მივიღოთ. ამიტომ, ამის თაობაზე უსაფრთხოების სისტემაში შემავალი სამინისტროების ხელმძღვანელებთან გვქონდა საუბარი, გავაანალიზეთ ყველამ ერთად და შევთანხმდით, რომ სავალდებულო სამხედრო სამსახური გადავა მთლიანად თავდაცვის სამინისტროს სისტემაში.

ეს გარდა იმისა, რაზეც მე უკვე ვისაუბრე, რომ დამატებით შეიქმნება ეფექტური სისტემა და პროგრამა იქნება 6 თვიანი, 8 თვიანი,11 თვიანი, იმის მიხედვით, ვინ როგორ კარიერას ირჩევს შემდგომში. მინიმუმ იქნება 6 თვიანი პროგრამა. არ იქნება უბრალოდ თეორიული სწავლება, იქნება ინტენსიური საბრძოლო, სამხედრო მომზადება. ამ პროგრამის დამთავრების შემდეგ პირს ექნება მოხდილი სამხედრო სავალდებულო სამსახური და მიენიჭება რიგითის წოდება. ამას გარდა, გეტყვით, რომ ერთ-ერთი მთავარი მიზანი იქნება ძლიერი რეზერვის შექმნა. ასევე, ჩვენ ერთად გვქონდა ამის თაობაზე საუბარი, გაწვევას რეგიონული სამინისტროს ნაცვლად განახორციელებს თავდაცვის უწყება.

 ეს პროცესი დაიწყება იანვრიდან, მაგრამ ამოქმედდება 2025 წლის 1 იანვრიდან. მანამდე სამინისტროს სჭირდება მოწესრიგება, სისტემის კარგად მომზადება. ასევე, გვინდა, რომ რეგიონებში ავაშენოთ თავდაცვის ცენტრები, რომ ადგილზე გაუადვილდეთ ჩვენს ახალგაზრდებს ჯერ ერთი, ინფორმაციის მიღება და მეორე ის, რომ მაქსიმალურად კომფორტულად მოხდეს ჩაწერა და რეკრუტირება. ეს პროექტი დაგვიჯდება დაახლოებით 80 მილიონ ლარზე მეტი 2025 წლის 1იანვრიდან. ეს თემა გავლილი გვაქვს და შესაბამისი თანხები მობილიზებული იქნება",- განაცხადა ირაკლი ღარიბაშვილმა.

ირაკლი ღარიბაშვილმა „გირჩის“ რელიგიურ ორგანიზაციაზეც (“ბიბლიურ თავისუფლება”) ისაუბრა, რომელიც მსურველებს სავალდებულო სამხედრო სამსახურის გადავადებაში ეხმარება და განაცხადა, რომ ეს საკანონმდებლო ხარვეზი აღმოიფხვრება და ორგანიზაციაში გაწევრიანება სამხედრო სამსახურისგან თავის არიდების გარანტი აღარ იქნება.

 “ალბათ, ქვეყანაში არ მოიძებნება ამ ქვეყნის პატრიოტი, რომელიც ამ საკითხზე არ წუხს და არ განიცდის. ეს იყო “გირჩის” მოგონილი, მავნებლური, უმსგავსო, ანტიეროვნული, ანტისახელმწიფოებრივი პროგრამა, რომლითაც ახალგაზრდებს აბნევდნენ და სთავაზობდნენ ალტერნატიულ სამსახურს. ეს იყო ფიქტიური, ვითომ რელიგიური სამსახური. ეს იყო ყველაზე დიდი მკრეხელობა და სისაძაგლე. პირდაპირ დავარქმევ ამ სახელს, არ შეიძლება ამაზე თვალი დავხუჭოთ.

ჩვენი ვალია, რომ ეს საკითხი მოვაგვაროთ და მოვაგვარეთ კიდევაც. და გეტყვით ახალ როგორ: აღმოიფხვრება ეს საკანონმდებლო ხარვეზი, რომელიც მანამდე ბატონმა ზურაბ ჯაფარიძემ გააკეთა, დიდი პატივია მისი სახელის ხსენება ამ მთავრობის სხდომიდან… ეს იყო ყველაზე დიდი მავნებლობა, რაც ჩაიდინა ქვეყნის ახალგაზრდობის, ჩვენი მომავალი თაობის წინააღმდეგ. ამიტომ, დაიხურება, ეს ხარვეზი აღმოიფხვრება და გამოირიცხება მათი ფიქტიური, ვითომ რელიგიური ორგანიზაციის შესაძლებლობა” - განაცხადა ირაკლი ღარიბაშვილმა.

პრემიერ-მინისტრის თქმით, აღნიშნული საკითხი მთავრობამ საპატრიარქოსთან უკვე  გაიარა.