სახელმწიფო დუმაში მხარს უჭერენ საქართველოსთან პირდაპირი ფრენების აღდგენის იდეას. საერთაშორისო ურთიერთობათა კომიტეტის თავმჯდომარის პირველმა მოადგილემ დიმიტრი ნოვიკოვმა განაცხადა, რომ მხარს უჭერს საქართველოსთან სავიზო რეჟიმის ვადამდე გაუქმებას და ამ ქვეყანასთან პირდაპირი ფრენების აღდგენას. „რაც უფრო მაღალი იქნება კომუნიკაცია რუსეთსა და სხვადასხვა ქვეყნებს შორის, მით უკეთესი“.
„მიუხედავად იმ რთული პერიოდისა, რომელიც რუსეთის ფედერაციამ გამოიარა საქართველოს ხელისუფლებასთან, ამ ქვეყანაში უამრავი მოქალაქე ცხოვრობს, რომლებიც ძალიან თანაუგრძნობენ რუსეთის ფედერაციას და მხარს უჭერენ ჩვენს ხალხებს შორის მეგობრულ ურთიერთობას. აქედან გამომდინარე, მე, რა თქმა უნდა, მხარს დავუჭერდი საავიაციო კომუნიკაციების აღდგენას,“ — აცხადებს ნოვიკოვი. ინფორმაციას ამის შესახებ რუსული მედია ავრცელებს.
„რაც შეეხება ვიზებს, აქაც ანალოგიურად განვიხილავდი სიტუაციას. მიუხედავად იმისა, რომ აქ უკვე უფრო ფრთხილად არის საჭირო ყველა დადებითი და უარყოფითი მხარეების შესწავლა. მაგრამ არ გამოვრიცხავ, რომ უახლოეს მომავალში ღირდეს ამ სახელმწიფოსთან სავიზო რეჟიმის სერიოზულად შემსუბუქება,“— აღნიშნა ნოვიკოვმა.
დეკემბრის ბოლოს საგარეო საქმეთა მინისტრის მოადგილემ მიხეილ გალუზინმა აღნიშნა, რომ ქვეყანა არ გამორიცხავს საქართველოს მოქალაქეებისთვის სავიზო რეჟიმის გაუქმებას, თუმცა აღნიშნა, რომ ამისათვის გარკვეული პირობები უნდა შეიქმნას. ახლა რუსებს შეუძლიათ საქართველოს ტერიტორიაზე შესვლა უვიზოდ, მაგრამ საქართველოს მოქალაქეებს რუსეთში გასამგზავრებლად ვიზა სჭირდებათ. დეკემბრის დასაწყისში დსთ-ს საკითხებში სახელმწიფო სათათბიროს კომიტეტის ხელმძღვანელმა ლეონიდ კალაშნიკოვმა სავიზო რეჟიმის გაუქმებისა და ორ ქვეყანას შორის პირდაპირი ფრენების აღდგენის პერსპექტივაზე ისაუბრა.