თუკი აქამდე, როცა 19 აპრილის შეთანხმება იყო ძალაში, ამ დისკუსიის შედეგი წინასწარვე იყო ცნობილი, ახლა ეს ყველაფერი უბრუნდება კონსტიტუციურ ჩარჩოებს - სწორედ ამ განხილვების შედეგად უნდა შევჯერდეთ საბოლოო ვერსიაზე, - ამის შესახებ ჟურნალისტებს საკონსტიტუციო ცვლილებების საყოველთაო სახალხო განხილვის დაწყებამდე საპარლამენტო უმრავლესობის წევრმა, საკონსტიტუციო ცვლილებების საყოველთაო სახალხო განხილვის კომისიის თავმჯდომარემ შალვა პაპუაშვილმა განუცხადა.

მისივე თქმით, საკონსტიტუციო ცვლილებები სულ რამდენიმე საკითხს ეხება, თუმცა ყველა მნიშვნელოვანი საკითხია.

„ჩვენი დამოკიდებულებაა შემდეგი - ეს ცვლილებები, თავის დროზე, განაპირობა 19 აპრილის შეთანხმებამ, რომელიც ახლა არის ანულირებული. შესაბამისად, ამ დისკუსიაში შევდივართ ღია შედეგით, იმ კუთხით, რომ მზად ვართ მოვისმინოთ ყველა არგუმენტი და წარმოვადგინოთ ჩვენი, ამიტომაც გვაინტერესებს საზოგადოების მოსაზრება. თუკი აქამდე, როცა 19 აპრილის შეთანხმება იყო ძალაში მდგომარეობა იყო ის, რომ ამ დისკუსიის შედეგი წინასწარვე იყო ცნობილი, ახლა ეს ყველაფერი უბრუნდება კონსტიტუციურ ჩარჩოებს, რომელიც გულისხმობს, რომ სწორედ ამ განხილვების შედეგად უნდა შევჯერდეთ საბოლოო ვერსიაზე.

ამ ცვლილების ერთ-ერთი მთავარი ნაწილია საარჩევნო ბარიერი. სწორედ „ქართული ოცნება“ არის ის პოლიტიკური პარტია, რომელმაც 2020 წლის არჩევნები ჩაატარა 1%-იანი ბარიერით. ასე რომ, ჩვენი განწყობა, რომ დაბალი საარჩევნო ბარიერი, როგორც დროებითი ზომა საჭირო შეიძლება იყოს იმისთვის, რომ განვითარდეს პარტიების სისტემა, ცნობილია. ზოგადად, ჩვენი განწყობა ამ საკითხის მიმართ არის კონსტრუქციული და პოზიტიური. თუკი აქამდე იყო, რომ ის, რაც შეთანხმებიდან გამომდინარეობდა, შედეგი ამ განხილვების წინასწარ იყო ცნობილი, ახლა ვისმენთ არგუმენტებს“,- განაცხადა პაპუაშვილმა.

ცნობისთვის, საკონსტიტუციო ცვლილებების საყოველთაო სახალხო განხილვა გუშინ დაიწყო და დღეს თბილისში დასრულდება.

ipn.ge