დეზინფორმაციული კამპანიის მიზანი არის არეულობა, ხელისუფლების არადემოკრატიულად შეცვლა და ქვეყნის ჩართვა ომში, – განაცხადა პარლამენტის თავმჯდომარე შალვა პაპუაშვილმა.
პაპუაშვილმა ასეთი კომენტარი გააკეთა უკრაინის პრეზიდენტის ოფისის ხელმძღვანელის მრჩევლის, ალექსეი არესტოვიჩის განცხადებაზე: „მოლდოვისა და საქართველოს ხელმძღვანელობა არ არიან ომის ადამიანები, სააკაშვილს შეეძლო ამის გაკეთება, თუმცა არა ამჟამინდელ ხელმძღვანელობას“.
„უპირველეს ყოვლისა, ეს განცხადებაც და კომენტარიც იმას ადასტურებს, რაზეც ჩვენ ვსაუბრობდით. არ მინდა, ახლა ისევ ის ეპითეტები გავიმეორო, რასაც „ნაციონალურ მოძრაობასთან“ დაკავშირებით საზოგადოება იყენებს, მაგრამ სწორედ ამას ადასტურებს ომთან დაკავშირებით, რომ სწორედ ეს არის მთელი ამ დეზინფორმაციული კამპანიის მიზანი, არეულობა, ხელისუფლების არადემოკრატიულად შეცვლა და ქვეყნის ჩართვა ომში. ეს არის სწორედ მიზანი და ამას ვხედავთ და ამას ადასტურებს ეს კომენტარიც.
ერთიც მინდა, ვთქვა, თუკი დავაკვირდებით, ეს ტალღები რას მოჰყვა – იცით, რომ იყო ძალიან თბილი, მეგობრული ვიზიტი უკრაინაში, მრავალპარტიული, რომელსაც ერთი პარტია გამოაკლდა, „ნაციონალური მოძრაობა“. მერე ვნახეთ, რაც გააკეთეს ამ ყველაფრის შემდეგ, როდესაც იყო პირდაპირი დასტური საქართველოს და უკრაინის ხელისუფლებებს შორის გაგებისა, მეგობრობისა, თანადგომისა; ზუსტად მეორე დღიდანვე დაიწყო კამპანია. როგორც ჩანს, ეს ვიღაცას თვალში ცუდად მოხვდა, რომ ურთიერთობები გარკვეული არის და მეორე დღიდანვე დაიწყო ეს დეზინფორმაციული კამპანია და პროპაგანდა იმისთვის, რომ ეს ურთიერთობები კვლავ შეძლონ რომ რაღაცნაირად გააფუჭონ. მედიაწიგნიერებაში სწორედ ამას ვგულისხმობ, რომ ჩვენ ხომ კონტექსტებს უნდა შევხედოთ. კონტექსტი ხომ ეს არის – თბილი, მეგობრული ვიზიტი უკრაინაში. მეორე დღიდანვე დაწყებული აგრესიული კამპანია იმისთვის, რომ ურთიერთობები გაფუჭდეს ხელისუფლებებს შორის. შემდეგ დეზინფორმაციული კამპანია სხვადასხვა ჩანაწერებით და ა.შ. ამიტომ ყველამ, საზოგადოებამაც და მედიამაც კონტექსტს უნდა მიაქციოს ყურადღება და ამ კონტექსტიდან თავის დასკვნები გამოიტანოს.
სხვათა შორის, აქვე გეტყვით, ჩვენ ვნახეთ უკრაინის პრეზიდენტის პრესკონფერენციაზე, რომ მან აღარ გაიმეორა ის ბრალდება, რომელიც შეეხება ე.წ. კონტრაბანდას და ამით დაადასტურა, რომ ის ბრალდება, რომელიც წარდგენილი იყო საქართველოს მიმართ, იყო არამართებული, მსუბუქად რომ ვთქვათ; კარგია, რომ მან ეს არ დაადასტურა და აღარ გაიმეორა. ამ კუთხით, ვფიქრობ, რომ ყველა საკითხი ამოწურულია“, – განაცხადა შალვა პაპუაშვილმა.