საპენსიო სესხებზე საუბრისას, გიორგი ვაშაძე და მისი პოლიტიკური მოძრაობა -„მესამე ძალა-სტრატეგია აღმაშენებლი“ 6%-იანი ცდომილებით საუბრობენ.
კერძოდ, „სახელმწიფო პენსიის შესახებ“ კანონპროექტის განმარტებით ბარათში, ანუ ოფიციალურ დოკუმენტში, რომლის ავტორიც გიორგი ვაშაძეა, ნათქვამია, რომ „ლიბერთი ბანკში“ საპენსიო სესხზე ეფექტური საპროცენტო განაკვეთი 30.65 პროცენტს შეადგენს. (ციტატა კანონპროექტის განმარტებითი ბარათიდან): “საქართველოში, პენსიის გაცემის ექსკლუზიურ უფლებას “ლიბერთი ბანკი” ფლობს, მას არ ჰყავს კონკურენტი, შესაბამისად ბაზარზე პირობებს სწორედ „ლიბერთი ბანკი“ ადგენს. „ლიბერთი ბანკში“ საპენსიო სესხზე ეფექტური საპროცენტო განაკვეთი 30.65 პროცენტს შეადგენს“(https://info.parliament.ge/file/1/BillReviewContent/274600?fbclid=IwAR18Kt8iktu9s1PZBZsldACUCwoyNwdHdHxT4xoiZ41hTR5ybWFAZd1aGBk) იმავდროულად, წინასაარჩევნო პოლიტიკურ ვიდეორგოლში, რომელიც „სტრატეგია აღმაშენებლის“ მიერ სატელევიზიო ეთერებშია განთავსებული,სიტყვა-სიტყვით ისმის შემდეგი: „არსებული ხელისუფლების პირობებში, სესხის ყველაზე მაღალ - 36%-ს პენსიონერები იხდიან. ეს უსამართლოა“.
რთული სათქმელია, რამ გამოიწვია ოფიციალურ დოკუნტში სწორი ინფორმაციის ჩაწერა, ხოლო მასაზე გათვლილ სარეკლამო ვიდეორგოლში 6%-ით გაძვირებულ მონაცემზე აპელირება. თუმცა, თამამად შეიძლება ითქვას, რომ მსგავსი ტიპის ცდომილება პრაქტიკულად გამორიცხულია მექანიკური შეცდომის შედეგად იყოს გამოწვეული. უფრო მეტიც, ჩნდება გონივრული ეჭვი, რომ გიორგი ვაშაძე პოლიტიკური დივიდენდების მოპოვების მიზნით, საკითხის დამძიმებას შეგნებულად ცდილობს, ან მეორე, გიორგი ვაშაძე საუბრობს ისეთ საკითხზე, რასთან დაკავშირებითაც დაზუსტებული მონაცემები და ფაქტობრივი გარემოებები ზუსტად შესწავლილი არ აქვს.
ორივე შემთხვევაში მსგავსი სენსიტიური თემის მიმართ ასეთი დამოკიდებულება კატეგორიულად მიუღებელია. ამდენად, არის ეს შეცდომა თუ საქმე გვაქვს მიზანმიმართული პოპულიზმის მორიგ ფაქტთან, ამ კითხვით გიორგი ვაშაძის ოფისს დავუკავშირდებით და, ბუნებრივია, საკითხზე კომენტარს მიღებისთანავე შემოგთავაზებთ.
ვახო დაგანძე