„უნდა მოვახდინოთ რაღაც გონივრულ ზღვარზე ფასების ჩამოწევა... მინისტრებო დაიბარეთ მსხვილი იმპორტიორები,“ - ეს განცხადება პრემიერმა ირაკლი ღარიბაშვილმა 6 თებერვლის მთავრობის სხდომაზე გააკეთა, სადაც სურსათისა და ნავთობის იმპორტიორები ფასების განგებ გაზრდასა და ხალხის ხარჯზე გამდიდრებაში დაადანაშაულა.

საქართველოს გაცხადებული აქვს, რომ მისი ეკონომიკური პოლიტიკა თავისუფალი ბაზრის პრინციპებს ემყარება. სადაც ფასები არა პრემიერთან „დაბარებამ“, არამედ ჯანსაღმა კონკურენციამ უნდა დაარეგულიროს. რა უშლის ხელს ქვეყანაში ჯანსაღი კონკურენციის არსებობას. ამასთან დაკავშირებით პრემიერს დეტალები არ დაუკონკრეტებია, თუმცა მმართველი პარტიის წევრი, საფინანსო-საბიუჯეტო კომიტეტის თავმჯდომარის პირველი მოადგილე  პაატა კვიჟინაძე „კომერსანტთან“ საუბარში მინიშნებას შესაძლო კარტელურ გარიგებებზე აკეთებს. მისი თქმით, პრემიერმა ისაუბრა არა ფასების კონტროლზე, არამედ იმის დარეგულირებაზე, რომ მსგავსი გარიგებები არ მოხდეს:

„პრემიერს არ უთქვამს „ფასების კონტროლი“ როგორც სიტყვა, როგორც თქვენ ამბობთ. ეგ ნიშნავს, რომ საბაზრო ეკონომიკას ვწყვეტთ. არა, ჩვეულებრივად გრძელდება საბაზრო ეკონომიკა, ჩვეულებრივად იქნება დაცული, ყველანაირად, კონსტიტუციით და ყველაფრით. ოღონდ ყველა ქვეყანაში არის ანტიმონოპოლიური, კონკურენციის სააგენტოები. ყველა დასავლურ, ცივილიზებულ ქვეყანაშიც რაღაც შეთანხმებები ხდება ხოლმე და ასე შემდეგ. მით უმეტეს ისეთ პატარა ქვეყანაში, როგორიც საქართველოა, ეს ძალიან მარტივად შეიძლება მოხდეს. ამერიკაში, სადაც ათასობით და ათიათასობით მომწოდებელია, ეს თითქმის გამორიცხულია, მაგრამ იქაც კი აღწევენ ხოლმე ასეთ რამეს. საქართველოში შესაძლოა რაღაც პროდუქტზე ერთი, ორი ან სამი მომწოდებელი იყოს და აქ შეძლება იყოს ასეთი რაღაცები, შესაძლოა, შეთანხმებები მოხდეს და პრემიერი სწორედ ამას ამბობს, რომ ამნაირი რამე თუ არის სადმე, ეს დავარეგულიროთ. ზოგადად საბაზრო ეკონომიკას არავინ არ ეხება.

რატომ არის ეს 80%-იანი ფასნამატი ? ეს გულისხმობს, რომ ალბათ რაღაც შეთანხმებაა, თორემ იქ რომ კონკურენცია წავიდეს, თავისთავად ვიღაც 70%-ს დაადებს, ვიღაც ნაკლებს. კონკურენციის მთელი სიკეთე მაგაშია, რომ არ აძლევს საშუალებას ფასები გაიზარდოს,“ - განაცხადა პაატა კვიჟინაძემ.

მმართველი პარტიის წევრი არ ეთანხმება ეკონომისტების ნაწილის და ოპოზიციის შეფასებას იმასთან დაკავშირებით, რომ პრემიერის განცხადება ეკონომიკური შინაარსისგან დაცლილი იყო და პოლიტიკური ქულების დაწერას ემსახურებოდა. პაატა კვიჟინაძის თქმით, საკითხი იმდენად დიდია, რომ ამას მხოლოდ კონკურენციის სააგენტო ვერ აუვა თავის რესურსით და სწორედ ამიტომ დაავალა პრემიერმა მინისტრებს ამ საქმეში უფრო მასშტაბურად ჩართვა.

„პოლიტიკური ქულების დაეწერა რა შუაშია. კონკურენციის სააგენტო ამას გამოავლენს, მაგრამ იქ 10 თუ 20 თანამშრომელი მუშაობს, ის როგორ შეძლებს მაგას? ის რომ გვეტყვის, რომ ასეა, შემდეგ უნდა ჩაერთოს ყველა. კანონით ეს განსაზღვრულია და ყველამ უნდა გააკეთოს თავის გასაკეთებელი. ნუ წარმოვიდგენთ, რომ კონკურენციის სააგენტოს ყველა რაიონში წარმომადგენელი ჰყავს.

კონკურენციის სააგენტოს რა უფლება მოვალეობებიც აქვს, იმას ასრულებს. მას აქვს უფლება გამოავლინოს ეს, გადასცეს სასამართლოს და ასე შემდეგ. მაგრამ მას ასევე აქვს უფლება შეისწავლოს რაღაც საკითხი და გადასცეს ვინც ეს სთხოვა, მომზადებული საკითხი, თუ რა ხდება ამ დარგში,“- აღნიშნა პაატა კვიჟინაძემ.