უკრაინის საგარეო საქმეთა სამინისტროს სპიკერი ოლეგ ნიკოლენკო გამოეხმაურა საქართველოს მმართველი პარტიის თავმჯდომარის ირაკლი კობახიძის განცხადებას იმასთან დაკავშირებით, რომ რუსეთთან ფრენების აღდგენა მნიშვნელოვანია და მისასალმებელი იქნება.
ოლეგ ნიკოლენკო რუსეთის საგარეო უწყების ხელმძღვანელის მხრიდან საქართველოს ხელისუფლების შექებას და შემდგომ საქართველოს ხელისუფლების განცხადებებს, თბილისსა და მოსკოვს შორის რევერანსების გაცვლას უწოდებს და ხაზს უსვამს იმას, რომ ეს რუსეთის მხრიდან საქართველოში ჩადენილი დაუსჯელი დანაშაულებისა და ოკუპაციის ფონზე ხდება.
„საქართველოს მმართველი პარტიის თავმჯდომარე თბილისსა და მოსკოვს შორის პირდაპირი ფრენების აღდგენის მომხრეა. მან ასეთი განცხადება რუსეთის საგარეო საქმეთა მინისტრის ქების პასუხად გააკეთა, როდესაც საქართველოს ხელისუფლება უკრაინაში რუსეთის აგრესიის გამო, დასავლეთის მიერ დაწესებული სანქციებზე არმიერთებისთვის შეაქეს.
თბილისი და მოსკოვი ერთმანეთს რევერანსებს უცვლიან ქართველი ხალხის წინააღმდეგ ჩადენილი დაუსჯელი დანაშაულებისა და ქართული ტერიტორიების ოკუპაციის ფონზე. ჩვენ ასევე ვთვლით, რომ მსგავსი პრორუსული რიტორიკა არ შეესაბამება უკრაინისა და საქართველოს მეგობრულ და სტრატეგიულ ურთიერთობებს და ეწინააღმდეგება საქართველოს კურს ევროკავშირის წევრობისკენ.
უკრაინა როგორც სახელისუფლებო, ისე ხალხის დონეზე, ყოველთვის საქართველოს მხარდამხარ იდგა, მის ისტორიაში განსაკუთრებით მძიმე დღეებში. გენოციდურ ომში რუსეთის მიერ უკრაინელების განადგურების მცდელობის ფონზე, ზოგიერთი ქართველი პოლიტიკოსის მხრიდან ქმედითი სოლიდარობის არარსებობა - პოლიტიკური მუხთლობაა.
რუსეთის აგრესიის წინააღმდეგობის გაწევასა და უკრაინის ტერიტორიის დეოკუპაციაში საქართველოს ოფიციალური ხელისუფლების მხრიდან ჩვენი სახელმწიფოს მხარდაჭერა შეესაბამება არა მხოლოდ უკრაინის, არამედ საქართველოს ინტერესებსაც,“ - წერს ოლეგ ნიკოლენკო სოციალურ ქსელში.