საერთაშორისო კომპანია ESET-ი, რომელიც ინფორმაციული უსაფრთხოების სფეროში ოპერირებს, განცხადებას ავრცელებს და მომხმარებლებს Telegram აპლიკაციის ყალბი ვერსიის გავრცელების შესახებ აფრთხილებს.

ESET-ის ინფორმაციით, Telegram-ის ყალბ პროგრამას სხვადასხვა ჯაშუშური პროგრამები აქვს და სატელეფონო ზარების ჩაწერა, SMS შეტყობინებების, ზარებისა და კონტაქტების სიების შეგროვება შეუძლია. თუ ყალბი აპლიკაცია თქვენს შეტყობინებებსა და ანდროიდის სხვა სერვისებზე მიიღებს წვდომას, კიბერკრიმინალები შემომავალი შეტყობინებების ნახვას 17 პროგრამიდან, მათ შორის Viber-დან, Skype-დან, Gmail-დან, Messenger-დან და Tinder-დან შეძლებენ.

Telegram-ის ყალბი აპლიკაცია Google Play-ზე არაა ხელმისაწვდომი. მის გასავრცელებლად ყალბი საიტი გამოიყენება, რომელიც Shagle-ის ვებ-რესურსადაა შენიღბული.

ყალბი აპლიკაცია იგივე სახელს იყენებს, რომელსაც ლეგიტიმური, მაგრამ თუ პოტენციური მსხვერპლის მოწყობილობაზე ოფიციალური Telegram აპლიკაცია უკვე დაინსტალირებულია, მაშინ ყალბი ვერსიის დაყენება შეუძლებელია.

„კიბერკრიმინალები პირველ რიგში პოტენციურ მსხვერპლს აიძულებენ, რომ მათი მოწყობილობებიდან Telegram-ი წაშალონ, ან იმ ქვეყნებზე არიან ორიენტირებული, სადაც კომუნიკაციისთვის Telegram-ი ნაკლებად გამოიყენება“, -  აცხადებს ESET-ის მკვლევარი.

თქვენს მოწყობილობაზე ასეთი საფრთხის თავიდან ასაცილებლად, ESET-ის ექსპერტები გირჩევენ, რომ კიბერუსაფრთხოების ძირითადი წესები დაიცვათ, კერძოდ - აპლიკაციები მხოლოდ ოფიციალური Google Play-დან ჩამოტვირთოთ და პროგრამებზე ნებართვების მინიჭება, აპლიკაციებისა და ოპერაციული სისტემის დროულად განახლება აკონტროლოთ.