აშშ-ში მსხვილი დეველოპერული კომპანია ტექნოლოგიურ სტარტაპთან გაერთიანდა იმისთვის, რომ მათ ერთობლივად ააშენონ 100 უჩვეულო სახლისგან შემდგარი საცხოვრებელი რაიონი - ისინი 3D პრინტერით დაიბეჭდება.
ეს იქნება ამ უახლესი ტექნოლოგიის გამოყენების ყველაზე მასშტაბური მაგალითი.
ამ გრანდიოზული და ჭეშმარიტად რევოლუციური პროექტის რეალიზება შტატ ტექსასში, ქალაქ ოსტინში დეველოპერული კომპანია Lennar Corp. და სამშენებლო ტექნოლოგიების კომპანია Icon-ის მიერ უკვე 2022 წელს დაიწყება.
Icon-მა, ისევე როგორც სხვა მსგავსმა კომპანიებმა, უკვე გამოიყენეს 3D პრინტერზე ამობეჭდილი დეტალები სახლების მშენებლობისთვის, მაგრამ ეს პროექტი გაცილებით მასშტაბურია - საუბარია ახალი ტექნოლოგიის მასობრივ გამოყენებაზე, რაც აქამდე ჯერ არავის გაუკეთებია.
თუ 3D ტექნოლოგიის გამოყენების ეს პრეცედენტი წარმატებული აღმოჩნდება, მან შესაძლოა შტატებში იაფი და ხარისხიანი საცხოვრებლის დეფიციტს წერტილი დაუსვას.
იპოთეკური კომპანია Freddie Mac-ის გათვლებით, დღეს შტატების უძრავი ქონების ბაზარს 3,8 მლნ სახლი აკლია. ამას რამდენიმე მიზეზი აქვს - პირველ რიგში წლების მანძილზე დაუძლეველ პრობლემად ქცეული მუშახელის დეფიციტი და პანდემიის გამო მიწოდების ჯაჭვში გაჩენილი შეფერხებები.
„ამ ვითარებაში აუცილებელია ალტერნატიული სამშენებლო გადაწყვეტილებები, რომლებიც მუშახელის დეფიციტის დაძლევაში დაგვეხმარება და 3D ტექნოლოგია, რომელიც იაფია და ბევრ სამუშაო ძალას არ საჭიროებს, შესაძლოა ამ შემთხვევაში იდეალური გამოსავალი გახდეს“, - მიიჩნევს Lennar-ის ვიცე-პრეზიდენტი ერიკ ფედერი.
ამ დროისთვის შტატებში სახლების დიდი უმრავლესობა ადგილზე, ტრადიციული სამშენებლო ტექნოლოგიების გამოყენებით შენდება. 3D-ზე ამობეჭდილი სახლები ნაწილ-ნაწილ აიწყობა და მას საფუძვლად ბეტონის კარკასი უდევს.
5 მეტრის სიმაღლის პრინტერს 1-სართულიანი სახლისთვის გარე და შიდა კედლების აშენება 1 კვირაში შეუძლია. Lennar-ში იმედოვნებენ, რომ ახლო მომავალში ამ პროცესის დაჩქარებას შეძლებენ.
Icon-ში კი დარწმუნებულები არიან, რომ 3D-ზე ამობეჭდილი სახლები უფრო იაფი იქნება და ნაკლებ ნარჩენებს წარმოქმნის.
თანაც, ამ დროს გაცილებით ნაკლების სამუშაო ძალა გამოიყენება - ჩვეულებრივ მშენებლობაზე 1 სართულიანი სახლის აშენებას 6-12 სპეციალისტი სჭირდება, მაშინ, როდესაც 3D ტექნოლოგიით - მხოლოდ 3.