დარგობრივი ეკონომიკისა და ეკონომიკური პოლიტიკის კომიტეტის სხდომაზე მესამე მოსმენით განიხილეს და მხარი დაუჭირეს ,,მაუწყებლობის შესახებ კანონპროექტს, რომელსაც ტელემაუწყებლები და მედიის უფლებებზე მომუშავე ორგანიზაციები აკრიტიკებენ.

კოალიცია „მედიის ადვოკატირებისთვის“ კოორდინატორი, ნათია კაპანაძე „კომერსანტთან" აცხადებს, რომ „ქართული ოცნების“ მიერ შემუშავებულ კანონპროექტს უარყოფითი შეფასება მოჰყვა არა მხოლოდ ქვეყნის შიგნით, არამედ ევროპის საბჭოს მხრიდანაც.

 „მაუწყებლობის შესახებ კანონში შესატანი ცვლილებები წინააღმდეგობაში მოდის ევროინტეგრაციის პროცესთან. ცვლილებების საფუძვლად მითითებულია, რომ უნდა ემსახურებოდეს ევროპის კანონმდებლობასთან დაახლოებას, მაგრამ ჩვენ ვხედავთ, რომ ეს არის წინააღმდეგობრივი. პირველი - ჩნდება პირდაპირი საკანონმდებლო შესაძლებლობა, რომ მარეგულირებელი კომისია ჩაერიოს მაუწყებლების შინაარსში და ეს წარმოება დაიწყება სიძულვილის ენის კონტროლით, რომლის დეფინიციაც სათანადოდ ცხადი არაა ჩვენს კანონმდებლობაში. მეორე - შემოდის პასუხის უფლება, იმგვარად რომ ნებისმიერ პოლიტიკოსს შეუძლია, საკუთარი ჩანაწერი წარადგინოს მედიასაშუალებაში და მოითხოვოს გაშვება ნებისმიერი ჟურნალისტური ჩარევების გარეშე და მესამე - მარეგულირებელი კომისიის გადაწყვეტილებები დაუყოვნებლივ შევა ძალაში, იმ გამოცდილებით, როგორიც არის მარეგულირებლის პოლიტიკურ იარაღად გამოყენება და მედიასაშუალებების დასჯის მუდმივი ტენდენცია, ცხადია, ნათლად გვაჩვენებს მომავალს მედიასაშუალებებთან დაკავშირებით. თუ აქამდე „ქართული ოცნების“ შეფასებები უბრალოდ იყო უარყოფითი ქართული მედიის მიმართ, რიგ შემთხვევაში ეს გადაიზრდება დასჯის, ფინანსური სანქციების ამოქმედების და შინაარსობრივი კონტროლის შესაძლებლობად,“- აცხადებს ნათია კაპანაძე.

 მისი თქმით, კანონპროექტთან დაკავშირებით ევროპის საბჭოს შუალედური დასკვნა უკვე ხელმისაწვდომია, რომელშიც ნათქვამია, რომ მისი მიღება ამ სახით არ უნდა მოხდეს და უნდა გადაიდოს. ნათია კაპანაძე ხაზს უსვამს იმას, რომ კომიტეტზე ცვლილებების მესამე მოსმენით მხარდაჭერა სწორედ სრული დასკვნის გამოქვეყნებამდე ერთი დღით ადრე მოხდა.

„ჩვენთვის მნიშვნელოვანია ევროპის საბჭოს შეფასებები, შუალედური დასკვნა უკვე ხელმისაწვდომია და გულისხმობს იმას, რომ სამივე საკითხი არის კრიტიკულად მნიშვნელოვანი მედიისთვის და მისი მიღება უნდა გადაიდოს. სრული დასკვნა უნდა იყოს 20 დეკემბერს. კომიტეტმა ცვლილებას მხარი დღეს მესამე მოსმენის ფორმატში დაუჭირა. როგორც ჩვენთვისაა ცნობილი, როგორც კანონი, მიმდინარე კვირაში, სესიაზე დამტკიცდება, ჩვენ დღეს კიდევ ერთხელ ვახსენებდით „ქართულ ოცნებას“, რომ ეს პროცესი ეწინააღმდეგება ევროინტეგრაციას და ევროპის საბჭოს წინასწარ დასკვნებს. როდესაც დასკვნა ხვალ უნდა მივიღოთ სრულად და დასკვნის საფუძველზე ვისაუბროთ, რატომ ხდება მხარდაჭერა სწორედ დღეს?!“- აცხადებს კოალიცია „მედიის ადვოკატირებისთვის“ წარმომადგენელი.

როგორც ნათია კაპანაძე ამბობს, „ქართული ოცნება“ მედიის უფლებებზე მომუშავე ორგანიზაციებს ბრალს დებს, რომ ისინი თანამშრომლობაზე არ მიდიან, თუმცა რეალურად არანაირ სათანამშრომლო სივრცეს არ ქმნის და პირიქით, მოსაზრებების დაფიქსირების შესაძლებლობას ზღუდავს.

„„ქართული ოცნება“ გვთავაზობს იმ სამუშაო ფორმატში შეერთებას, რომელიც არ არსებობს, ჩვენი თხოვნის მიუხედავად და აცხადებს, რომ ჩვენ არ ვართ მზად სათანამშრომლოდ. მაშინ როდესაც არსებობს მედიაორგანიზაციების ინტერესი, მათი თანხმობა, რომ ჩვენ რეგულირების პროცესი თავიდან ავირიდოთ და არსებობდეს თვითრეგულირების შენარჩუნებისთვის შეთანხმება. მეორეს მხრივ, „მედიის ადვოკატირების კოალიციამ“ არა მარტო საჯარო განცხადებებით, არამედ პირადი წერილებით მიმართა ცვლილების ავტორებს და სთხოვა, როგორც სამუშაო შეხვედრა, ასევე მოსაზრებების გაცვლა მესამე მოსმენამდე. უკუკავშირი არ ყოფილა და დღესაც როგორც სხვა შეხვედრებზე არ მოგვეცა მოსაზრებების დაფიქსირების შესაძლებლობა, უფრო სწორად ხელშეშლა მოხდა, რადგან აპირებდნენ ჩვენ დარბაზიდან გაძევებას, არ გქონდა შესაძლებლობა მიკროფონის ჩართვის,“- აღნიშნა ნათია კაპანაძემ.

ნათია კაპანაძის შეფასებით, თუ ტელემაუწყებლების, მედიის უფლებებზე მომუშავე ორგანიზაციების და ევროპის საბჭოს უარყოფითი დამოკიდებულების მიუხედავად კანონპროექტის მიღება მაინც მოხდა, ეს იქნება კიდევ ერთი მტკიცებულება, რომ პროცესი არ არის ევროინტეგრაციასთან თანხვედრაში.