„თუ ოპოზიციური პარტიები არ შედიან პარლამენტში, გირჩი იქ არ შევა. რაც გირჩს უნდოდა არის ის, რომ სურდა ოპოზიციურ პატიებთან ერთად რაღაცების კეთება. თუ ესენი არ შედიან, ჩვენ იქ რა გვინდა ცარიელ დარბაზში, იმათთან (ქართულ ოცნებასთან) ერთად ხომ არ დავიწყებთ სირბილს,“ - ამის შესახებ „გირჩის“ ლიდერმა ზურა ჯაფარიძემ tv pirvelis გადაცემაში ისაუბრა.
ცოტა ხნის წინ ცნობილი გახდა, რომ ევროპული საქართველო უარს ამბობს პარლამენტში შესვლაზე, ამის შესახებ პარტიის ლიდერმა, დავით ბაქრაძემ მიაწოდა ინფორმაცია მედიას.
მისი თქმით, არჩევნები ჩატარდა არათავისუფალ გარემოში და ამ მიზეზით, ამ პროცესის ლეგიტიმაციას არ შეუწყობენ ხელს. პარტია, ამავდროულად, უარს ამბობს მეორე ტურში მონაწილებაზეც.
როგორც ზურაბ ჯაფარიძე ამბობს, პარლამენტში შესვლას და ბოიკოტსაც თავისი პლიუსები და მინუსები აქვს, თუმცა თუ ოპოზიცია არ იქნება ცარიელ დარბაზში შესვლას არც „გირჩი“ აპირებს.
„ჯერ ისიც არ ვიცი ვინ შედის პარლამენტში, ახლა დაკომპლექტდება, სრული სურათი არ მაქვს.
ახლა მნიშვნელოვანია ისევ ოპოზიციური ერთიანობის შენარჩუნება ასეთ მნიშვნელოვან კრიტიკულ საკითხებზე, როგორიცაა პარლამენტში შესვლა-არშესვლის საკითხი. ბოიკოტს აქვს თავისი პლიუსები და მინუსები, შესვლასაც აქვს პლიუსები და მინუსები. მე გადაწყვეტილება მიღებული არ მაქვს და მჭირდება ოპოზიციასთან დისკუსია და საუბარი. თუ გადავწყვიტეთ რომ ბოიკოტს ვაცხადებთ იმიტომ, რომ წაგვართვეს არჩევანი, ეს არის ძალიან მძლავრი სიგნალი ჩვენი დასავლელი პარტნიორებისთვის და ამას ასე მარტივად ვერ გაატარებს ივანიშვილი.
ბოიკოტს თუ არ ვაცხადებთ, ამასაც აქვს პლიუსები, ტრიბუნა გაქვს და შეგიძლია აჯანჯღარო ხელისუფლება, რომელმაც კრიზისში შეიყვანა ქვეყანა,“- ამბობს ზურა ჯაფარიძე.
ახალი მოწვევის პარლამენტში შესვლაზე უარს აცხადებენ შემდეგი ოპოზიციური პარტიები: „ნაციონალური მოძრაობა, ევროპული საქართველო,სტრატეგია აღმაშენებელი,ლეიბორისტული პარტია, „მოქალქეები, „ლელო, მანდატებზე უარს ამბობს „პატრიოტთა ალიანსიც.
მარიამ მორგოშია
ზურაბ ჯაფარიძე
