როგორია უკრაინა-საქართველოს ურთიერთობა და სადაა მთავარი პრობლემები. ამის შესახებ საუბარია საქართველოში უკრაინის საქმეთა დროებითი რწმუნებულის, ანდრეი კასიანოვის სტატიაში, რომელსაც Європейська правда აქვეყნებს.

„უკრაინისა და საქართველოს ურთიერთობა საკმაოდ რთულ პერიოდს გადის, სწორედ ამიტომ მით უფრო მნიშვნელოვანია გარკვევა, სად არის ამ ურთიერთობაში განვითარება და სად წარმოიშვა პრობლემები. დავიწყოთ იქიდან, რაც ყველაზე ხშირად ფიგურირებს პრესაში - ჩვენი ურთიერთობის პრობლემური ადგილებიდან.

ამჟამად რჩება მნიშვნელოვანი უთანხმოება უკრაინის პრინციპულ საკითხებზე, როგორიცაა სამხედრო დახმარების გაწევა, რუსეთის ფედერაციის წინააღმდეგ ორმხრივი სანქციების რეჟიმის შემოღება, სავიზო რეჟიმის შემოღება რუსეთის მოქალაქეებისთვის, რომლებიც მასობრივად აფარებენ თავს საქართველოს. ასევე უკრაინის მოქალაქის მიხეილ სააკაშვილის კანონიერი უფლებებისა და ინტერესების დაცვა.

იარაღი

უკრაინული მხარე თანმიმდევრულია ყველა საერთაშორისო პარტნიორის, მათ შორის საქართველოს მიმართ იარაღის, სამხედრო აღჭურვილობისა და საბრძოლო მასალის მიწოდების მოთხოვნაში და იარაღის სასიცოცხლო აუცილებლობაზე რუსეთის ფედერაციის უკრაინაში ფართომასშტაბიანი შეჭრის დასაწყისშივე ღიად აცხადებდა.

კერძოდ, კიევმა ითხოვა ბუკის კომპლექსების გადაცემა, რომლებიც უკრაინამ საქართველოს 2008 წლის ომის დროს გადასცა.

უკრაინის თხოვნაში ასევე შედიოდა აშშ-ს მიერ საქართველოსთვის გადმოცემული ჯაველინის ტანკსაწინააღმდეგო კომპლექსები. ამ უკანასკნელთან დაკავშირებით იყო არა მხოლოდ შეთანხმება აშშ-დან, არამედ წინადადებაც კი, რომ ისინი ახალი კომპლექსებით ჩაენაცვლებინათ.

მიუხედავად იმისა, რომ საქართველოს მთავრობამ კატეგორიული უარი თქვა სამხედრო დახმარებაზე, უკრაინა ეწინააღმდეგება ამ საკითხის შიდა პოლიტიკურ დავებში გამოყენებას და უარყოფს ნებისმიერ ბრალდებას რუსეთის ფედერაციასთან საქართველოს ომში ჩაბმის მცდელობის შესახებ,“- წერს კასიანოვი.

საქართველოში უკრაინის საქმეთა დროებითი რწმუნებული მიხეილ სააკაშვილის თემასაც ეხება და აცხადებს, რომ  საზღვარგარეთ უკრაინის მოქალაქეების კანონიერი უფლებებისა და ინტერესების დაცვა ყოველთვის იყო და რჩება უკრაინის საგარეო საქმეთა სამინისტროსა და  ქვეყნის საგარეო დიპლომატიური ინსტიტუტების პრიორიტეტად.

„სწორედ ასეთი პოზიციებიდან ახორციელებს თავის საქმიანობას უკრაინის საელჩო საქართველოში უკრაინის მოქალაქისა და საქართველოს ექს-პრეზიდენტის, მიხეილ სააკაშვილის კანონიერი უფლებებისა და ინტერესების დასაცავად.

უკრაინა გამომდინარეობს იქიდან, რომ მიხეილ სააკაშვილის სიცოცხლისა და ჯანმრთელობის საკითხი არა პოლიტიკურ, არამედ ჰუმანიტარულ ჭრილშია, ამიტომ დაჟინებით სთხოვს საქართველოს ხელისუფლებას მოწყალების გამოვლენას და სიცოცხლის გადასარჩენად მკურნალობისთვის მის გადაყვანას ევროპისა და აშშ-ის წამყვან სამედიცინო დაწესებულებებში.  ჯანმრთელობის აშკარა სერიოზული მდგომარეობისა და უარყოფითი ტენდენციების გათვალისწინებით“- ნათქვამია კასიანოვის სტატიაში.

კასიანოვი საქართველოში რუსეთის მოქალაქეების მასობრივი იმიგრაციის თემაზეც წერს

„უკრაინის მოქალაქეები, რომლებიც იძულებულნი გახდნენ დაეტოვებინათ რუსეთის ფედერაციის მიერ დროებით ოკუპირებული უკრაინის ტერიტორიები, შეგვიძლია ვთქვათ, რომ მათი უმეტესობა საქართველოს ტერიტორიას სხვა ქვეყნებში, ძირითადად ევროპაში ტრანზიტისთვის იყენებს, მიუხედავად საქართველოს მოქალაქეების ფართო მხარდაჭერისა, როგორც სამთავრობო, ისე არასამთავრობო სექტორიდან.

ასეთი ტრანზიტული მიგრაციის ერთ-ერთ ფაქტორად მიგვაჩნია საქართველოში რუსეთის ფედერაციის მოქალაქეების არანორმალურად მაღალი რაოდენობა. მათ შორის უკრაინის მოსახლეობის გენოციდისა და პუტინის პოლიტიკის მგზნებარე მომხრეებისა.

გაერო-ს ლტოლვილთა სააგენტოს საქართველოს ოფისის მიერ საელჩოსათვის მიწოდებული მონაცემების თანახმად  2022 წლის ნოემბრის მდგომარეობით, 2022 წლის 24 თებერვლიდან, საქართველოში სულ 182 ათასი უკრაინელი შემოვიდა, ამავე დროს - 1 მილიონ 268 ათასი რუსი და 149 ათასი ბელორუსი.

საერთო ჯამში, საქართველოს ტერიტორიაზე 25 000-მდე უკრაინელი დარჩა, მაგრამ ამავე დროს - 116 000 რუსი და 12 000 ბელორუსი.

ამავდროულად, როგორც ჩვენი თანამემამულეების, ისე ჩვენი სასტიკი მეზობლების კონცენტრაცია შეიმჩნევა საქართველოს უდიდეს ქალაქებში - თბილისში, ბათუმსა და ქუთაისში.

საქართველოში უკრაინელების ხანგრძლივად ყოფნისთვის არახელსაყრელი ფაქტორია ფასების მკვეთრი ზრდა, როგორც საცხოვრებლის ქირაზე, ასევე საკვებსა და ყოველდღიურ საქონელზე, მათ შორის, რუსების არანორმალური რაოდენობის გამო. ფასები გაცილებით მაღალია, ვიდრე უკრაინაში და ევროპის ბევრ დედაქალაქში, მაგრამ შემოსავლის შესაძლებლობები და ხელფასები დაბალი რჩება, - აცხადებს უკრაინის საქმეთა დროებითი რწმუნებული.

ანდრეი კასიანოვი ორ ქვეყნის ურთიერთობაში არსებულ პოზიტივს უსვამს ხაზს და პირველ რიგში ასახელებს ქართველ მოხალისეებს, რომლებიც უკრაინის შეიარაღებული ძალების რიგებში იბრძვიან.

„სამწუხაროდ, 36 ქართველმა გმირმა უკვე გაწირა სიცოცხლე ჩვენი საერთო მტრისგან უკრაინისა და საქართველოს დასაცავად.  მათი გამარჯვებები და ვაჟკაცობა სამუდამოდ დარჩება უკრაინელების მეხსიერებაში.

ასევე, არ არსებობს მნიშვნელოვანი განსხვავებები უკრაინასა და საქართველოს შორის საერთაშორისო ასპარეზზე ურთიერთპოლიტიკური მხარდაჭერის, მათ შორის სუვერენული ტერიტორიების დეოკუპაციის საკითხში.“- აღნიშნა კასიაბოვმა. ის ასევე ხაზს უსვამს საქართველოს მთავრობის მიერ სკოლებში უკრაინული სექტორის გახსნის მნიშვნელობას და იმ ძალისხმევას, რომელიც საქართველოს ხელისუფლებამ უკრაინის მოქალაქეების სასტუმროებში განთავსებისა თუ ფინანსური დახმარების მხრივ გასწია.

„უკრაინის მოქალაქეებისთვის სამედიცინო მომსახურება და საზოგადოებრივი ტრანსპორტით მგზავრობა უფასოა.

კიდევ ერთი ინიციატივა: სამშენებლო კომპანია არსი მუშაობს დაბალი შემოსავლის მქონე უკრაინელებისთვის მოდულური ქალაქების სწრაფი მშენებლობის საკითხზე, მათ საფუძველზე კომუნების შექმნის შესაძლებლობით, დახმარებას უწევს დასაქმებასა და სოციალურ ადაპტაციას.

ეს მხოლოდ ნაწილია იმ დახმარებისა, რომელიც საქართველოსგან მოდის. ეს მოდის როგორც ხელისუფლების, ასევე ოპოზიციის, კულტურის მოღვაწეებისა და რიგითი მოქალაქეებისგან, ასევე საქართველოს მართლმადიდებელი ეკლესიის წარმომადგენლებისგან.

მთავრობის, საქართველოს მართლმადიდებელი ეკლესიის საპატრიარქოს, ბიზნეს წრეების, საჯარო სექტორის, პოლიტიკური პარტიებისა და დაინტერესებული მოქალაქეების ერთობლივი ძალისხმევით 1120 ტონაზე მეტი ჰუმანიტარული საქონელი (საკვები, მედიკამენტები, პირველადი მოხმარების ნივთები, ტანსაცმელი და ა.შ. ) შეგროვდა და გაიგზავნა უკრაინაში.

მთელი მსოფლიოსთვის ცნობილი გახდა საქართველოს საზოგადოებრივი ორგანიზაციების აქცია „გააზიარე სინათლე“, რომელსაც შეუერთდნენ ქართული პოლიტიკური პარტიები და მოძრაობები, რამაც საშუალება მისცა მოკლე დროში შეეგროვებინა და უკრაინაში მიეწოდებინა საყოფაცხოვრებო საჭიროებისთვის 470-ზე მეტი გენერატორი.

თავის მხრივ, საქართველოს მთავრობამ 2022 წლის დეკემბერში უკრაინას გადასცა 25 სამრეწველო გენერატორი (კერძოდ, 400 და 600 კვტ სიმძლავრის), რომლებიც ამჟამად მიეწოდება კიევს, ლვოვს, ხარკოვს, მიკოლაივსა და გოსტომელს,“- აცხადებს კასიანოვი.

უკრაინის საელჩოს წარმომადგენლის თქმით, რუსეთის ფართომასშტაბიანმა აგრესიამ ნათლად აჩვენა, რომ საერთო მტერს, რომელმაც თავხედურად დაიპყრო როგორც უკრაინის, ასევე საქართველოს სუვერენული ტერიტორიები, უნდა დაუპირისპირდეს სოლიდარობა, ურთიერთდახმარება საკითხთა ფართო სპექტრში და ერთიანობა.  ყველა უთანხმოება და კამათი კი მტერზე სრული და შეუქცევად გამარჯვებმდე უნდა გადავდოთ.