მხოლოდ ქუჩით უბრალოდ ვერაფერს ვერ მოიგებ, მაშინ რადიკალური გადაწყვეტილებები უნდა მიიღო და საზოგადოებაც მზად იყოს ამისთვის. საპროტესტო აქცია ლოზუნგით - „მე მოვალ და შენ წადი“, არსად არ გამოსულა, - ამის შესახებ პოლიტოლოგმა ვანო მაჭავარიანმა „პალიტრანიუსის“ გადაცემაში „დღის ნიუსრუმი“ ოპოზიციის სამოქმედო გეგმაზე საუბრისას განაცხადა.
პოლიტოლოგის თქმით, თუ საზოგადოების მუხტზე დაკვირვებით არ ჩანს, რომ აქციებზე მილიონი ადამიანი გამოვა, ამას მთავრობაც ძალიან კარგად გაიგებს და „ქართული ოცნება“ ამ ტიპის საპროტესტო აქციებს შეეგუა.
,,არ იცოდნენ რომ ამ ციფრებს გამოაცხობდნენ და მანიპულირება იქნებოდა ამომრჩევლის ნებით? ეს პროტესტი უნდა დაეგეგმათ, ასე სპონტანურად ამ შედეგის გასაპროტესტებლად გაცილებით ნაკლები ხალხი მივიდა, ვიდრე მიხეილ სააკაშვილის გათავისუფლების მოწოდებით. მე თუ მკითხავთ დაუგეგმავი ჩანს ეს ქუჩა და პოლიტიკური პროცესები. როგორც ჩანს ადამიანი, ვინც ამ გადაწყვეტილებების მიმღებია, ყველაფერს თავის თავზე იღებს, არ არის ერთიანი პოზიცია ამასთან მიმართებაში და სხვანაირად უნდა მიდგომა.
მხოლოდ ქუჩით უბრალოდ ვერაფერს ვერ მოიგებ, მაშინ რადიკალური გადაწყვეტილებების მიღების რეჟიმში უნდა იყო და საზოგადოება მზად იყოს ამისთვის. საპროტესტო აქცია ლოზუნგით - „მე მოვალ და შენ წადი“ არსად არ გამოსულა ბოლო პერიოდში, გარდა ხავერდოვანი რევოლუციებისა. შეიძლება იყო მართალი, მაგრამ უნდა იყო მართალიც და ბრძენიც, რომ შენი სიმართლე არამხოლოდ დაამტკიცო, არამედ პრაქტიკული რეალიზაციაც მოახდინო, რათა შეიცვალოს ეს მახინჯი სისტემა. თუ ისეთი მუხტია საზოგადოებაში, როდესაც არ ჩანს რომ გამოვა მილიონი ადამიანი, ამას მთავრობა ძალიან კარგად გაიგებს, „ქართული ოცნება“ შეეგუა ამ ტიპის საპროტესტო აქციებს“, - აღნიშნა ვანო მაჭავარიანმა.
მისივე შეფასებით, პარლამენტის ბოიკოტი არ არის სწორი არჩევანი და როგორც საზოგადოება, ასევე საერთაშორისო თანამეგობრობა ამ ნაბიჯს არ იღებს.
,,მგონია ეს დაგვიანებული და ათასჯერ განვლილი თემაა, იყო პოლიტიკური აქტორი და არ იყო საპარლამენტო პროცესების ნაწილი ცოტა უცნაურია. საერთაშორისო თანამეგობრობაც და საზოგადოებაც ამ ნაბიჯს არ იღებს. ვფიქრობ, ეს ისევ ემოციურ ფონზე კეთდება, პარლამენტის ბოიკოტი არ არის სწორი არჩევანი, რა შედეგს იძლევა ეს? ბოიკოტის რეჟიმი და რა? ძალიან მინდა ოპოზიციას ჰქონდეს დაგეგმილი გასვლაც, ბოიკოტიც და მანდატებზე უარის თქმაც. ამ სისტემას ასევე შიგნიდან და პოლიტიკური სივრციდან უნდა ებრძოლო, ამისთვის არის პარლამენტი, რომ პოლიტიკური ბრძოლა განახორციელო. არ მგონია, რომ მარტო ქუჩა იქნება ეფექტური მექანიზმი, ამ თვალსაზრისით მნიშვნელოვანია პარლამენტიც იყოს გამოყენებული“, - აღნიშნა ვანო მაჭავარიანმა.
ipn.ge