ჩვენ არ გვინდა მუდმივ ბოიკოტში მყოფი ოპოზიცია ვნახოთ. იმედი გვაქვს, რომ მედიაციის მეორე ფაზა წარმატებით დასრულდება, - ამის შესახებ კონსტიტუციონალისტმა ვახუშტი მენაბდემ „იმედის ფაქტორში“ განაცხადა.

მისი თქმით, მოლაპარაკების პროცესში პოლიტიკური პარტიების უმეტესობა ცდილობს, ამომრჩეველს თავისი შეუვალობა დაანახოს.

„სამწუხაროდ, ჩვენ ვერ ვხედავთ ენთუზიაზმს პოლიტიკურ პარტიებს შორის დაიხიონ უკან და მიაღწიონ შეთანხმებას, რომელიც ქვეყანას სტაბილიზაციისკენ წაიყვანს. იმის მიუხედავად, თუ რა ხდებოდა მედიაციის პროცესში, პოლიტიკური აქტორების ძირითადი უმრავლესობა ორიენტირებულია იმაზე, რომ ამომრჩეველს თავისი შეუვალობა დაანახოს“, - განაცხადა მენაბდემ.

მისივე თქმით, აღნიშნული ამომრჩეველთან კომუნიკაციის საუკეთესო სტრატეგია არ იყო, რადგან საზოგადოების დიდ ნაწილს სურს პოლიტიკური პარტიები უფრო ორიენტირებული იყვნენ ქვეყანაში არსებული პრობლემების გადაჭრაზე.

„პოლიტიკური კრიზისის გადაჭრა კონსენსუსს ეფუძნება. თუ პოლიტიკური მხარეები არ შეთანხმდნენ, რომ ახლა საჭიროა თვისობრივ საკითხებზე მსჯელობა და სხვადასხვა პოლიტიკური საკითხის განხილვა, იქნება ეს ეკონომიკა, სოციალური თუ საგარეო პოლიტიკა. თუ ამ საკითხებზე არ მოხდა მსჯელობა, მაშინ საუბარი რაიმეზე ძნელია. არ მინდა, ვიყო განწყობილი უიმედოდ, რომ რომელიმე რადიკალურად განწყობილი პოლიტიკური ძალა ქვას ააგდებს და თავს შეუშვერს, ბოლომდე ასე დარჩება. ამ ქვეყნის მოქალაქეების დიდ ნაწილს არ სურს, იხილოს პარლამენტი ამომრჩევლის განწყობის გარეშე. ჩვენ არ გვინდა, ვნახოთ პარლამენტი, სადაც უმრავლესობა უმცირესობის ხელების გადაგრეხვითაა დაკავებული; ჩვენ არ გვინდა მუდმივ ბოიკოტში მყოფი ოპოზიცია ვნახოთ. იმედი გვაქვს, რომ მედიაციის მეორე ფაზა წარმატებით დასრულდება“, - განაცხადა მენაბდემ.

imedinews.ge