ვაზისუბნის 62-ე საარჩევნო უბანთან, „ნაციონალური მოძრაობის“ თავმჯდომარე ნიკა მელიასა და „ქართული ოცნების“ წარმომადგენლებს - ბექა დავითულიანსა და გიორგი ამილახვარს შორის სიტყვიერი დაპირისპირება და შეხლა-შემოხლა მოხდა.

აღნიშნულ უბანზე დაპირისპირება მას შემდეგ დაიწყო, რაც შუქი ჩაქრა და ადგილზე ნიკა მელია მივიდა.

დაპირისპირება ამ წუთებში „ნაციონალური მოძრაობისა“ და „ქართული ოცნების“ მხარდამჭერებს შორის გაგრძელდა. 

ნიკა მელიასთან რამდენიმე ადამიანი ცდილობდა მიახლოებას, იყო სიტყვიერი დაპირისპირება, თუმცა პოლიციამ ისინი ვითარებას განარიდა. როგორც მელიამ ჟურნალისტებს განუცხადა, ეს არის საარჩევნო დივერსია. მისი თქმით, შუქს აქრობენ, რადგან ხელისუფლება ბევრ უბანს აგებს.

„ძალიან მშვიდად ვიყოთ, არ ავყვეთ ამათ დაპირისპირებაში. ჩვენ არ ავყევით მათ დაპირისპირებაში და ზიზღის, მტრობის ფრქვევაში. შედეგად მივიღეთ ის, რომ დღეს „ქართული ოცნება“ მარცხდება. პარალელურად ხდება ვითომ მოძველბიჭო ელემენტების მობილიზაცია საარჩევნო უბნებთან, სადაც შუქს აქრობენ. გაიგეთ „კანონიერო ქურდებო“, ვითომ ძველო ბიჭებო, თქვენ ვერ იქნებით დომინანტები ამ ქალაქში. ამ ქალაქის მომავალი არის მრავალფეროვანი კოალიციური მართველობა, სადაც თქვენ თქვენი ადგილი გექნებათ, მაგრამ ვერ იქნებით იმ მდგომარეობაში, რომ ხალხი დაჩაგროთ“,-განაცხადა მელიამ.

მოგვიანებით, როცა მელია ჟურნალისტებთან კომენტარს აკეთებდა, მას მოქალაქემ ზურგიდან ჩაარტყა. აღნიშნულს ფიზიკური დაპირისპირება მოჰყვა.

სამართალდამცავებმა ერთი პირი დააკავეს.

„ქართული ოცნების“ დეპუტატმა ბექა დავითულიანი ვაზისუბნის ინციდენტის კომენტირებისას ამბობს, რომ ნიკა მელია ადგილზე იმიტომ მივიდა, რომ სურს ისარგებლოს შუქის ჩაქრობით და "ოცნების" მოგებული უბანი გააუქმოს.  დავითულიანი ამტკიცებს, რომ თბილისის მასშტაბით აგებს არჩევნებს.

„მთელ თბილისში აგებს და რა მნიშვნელობა აქვს ერთ უბანზე პროვოკაციის მოწყობას და ჩხუბისკენ გაქაჩვას,“- განაცხადა დავითულიანმა.

ცნობისათვის, ვაზისუბნის 62-ე საარჩევნო უბანზე ელექტროენერგია გაითიშა, რამაც ხმაური გამოიწვია. ადგილზე მივიდა "ნაციონალური მოძრაობის" თავმჯდომარე და მერობის კანდიდატი ნიკა მელია, ასევე ადგილზე იმყოფებიან "ქართული ოცნების" დეპუტატები ბექა დავითულიანი და გიორგი ამილახვარი.

დავითულიანის ინფორმაციით, როგორც მას უთხრეს, შუქი მოკლე ჩართვის გამო ჩაქრა, ხოლო ადგილზე მისული აგრესიული ადამიანები ნიკა მელიას მხარდამჭერები იყვნენ. ჟურნალისტის დაზუსტებაზე, როგორ დაარტყამდნენ მელიას მისივე მხარდამჭერები, დავითულიანი აცხადებს, რომ მასაც დაარტყეს.