„ჩვენ დასაკარგი დრო არ გვაქვს და უცილებელია მოქმედება. მისასალმებელია, რომ კონკრეტული სამუშაო ჯგუფების შექმნის თაობაზე აქტიურად დაიწყო საუბარი“, - ამის შესახებ, რადიო „კომერსანტის“ ეთერში „ჯეოქეისის“ ამერიკისმცოდნეობისა და ევროატლანტიკური მიმართულების დირექტორმა ხათუნა ბურკაძემ ისაუბრა.

ბურკაძის თქმით, ინიციატივა იძლევა იმის თქმის შესაძლებლობას, რომ როგორც ხელისუფლება, ისევე ოპოზიცია უნდა ჩაერთოს პროცესში კონსენსუსის  საფუძველზე, ერთობლივად შეძლონ იმ რეფორმების განხორციელება, რომელზეც საუბარია ევროკომისიის მიერ შემოთავაზებულ ე.წ.  გზამკვლევში.

„ევროკომისიის გზამკვლევს თუ კარგად გავეცნობით, პირველი პუნქტი არის სწორედ პოლარიზაციის დაძლევა, ამისთვის  აუცილებელია  დიალოგი, პროცესში ერთობლივად ჩართვა და  ერთობლივი  ძალისხმევით  გარკვეულ შეთანხმებამდე მისვლა. ამიტომ ეს თითოეულმა მხარემ კარგად  უნდა გააანალიზოს, რადგან დღეს წყდება ჩვენი ევროპული მომავალი, შესაბამისად  ეს მოითხოვს პოლიტიკური ვიწრო დღის წესრიგის გვერდზე გადადებას  და სახელმწიფო ინტერესებიდან  გამომდინარე გადაწყვეტილებების მიღებას. ყველაფერი უნდა გავაკეთოთ არა პროცესის საზიანოდ, არამედ პირიქით პროცესის სასარგებლოდ. პროცესის  სასარგებლოდ ნაბიჯების გადადგმა კი, უპირველეს ყოვლისა მოითხოვს იმას, რომ რომ  ჩვენ გადავლახოთ გარკვეული ბარიერები და ამ ბარიერების გადალახვის  შედეგად დავსხდეთ და მივაღწიოთ კონკრეტულ შედეგებს ევროპული ინტეგრაციის გზაზე“, - აღნიშნა ხათუნა ბურკაძემ. 

„კომერსანტის“ ეთერში ხათუნა ბურკაძემ მადრიდის NATO-ს სამიტზეც ისაუბრა და კონკრეტულ შედეგზე, რომელიც საქართველოს ეხება — ალიანსის წევრმა ქვეყნებმა საქართველოზე მორგებული დახმარების ღონისძიებათა დოკუმენტიც მიიღეს. ცნობილია, რომ დოკუმენტი მიზნად ისახავს საქართველოს თავდაცვითი შესაძლებლობების კიდევ უფრო განვითარებას და ამ პროცესში ალიანსის უფრო ქმედით ჩართულობას კონკრეტული ღონისძიებების სახით, მათ შორის კიბერთავდაცვითი ინსტრუმენტების გაძლიერების, სიტუაციური ანალიზისა და კრიზისებზე ეფექტიანი რეაგირების მიმართულებებით.

„პოლიტიკური ნაწილიც ძალიან საყურადღებოა იმ თვალსაზრისით, რომ NATO-მ სტრატეგიული კონცეფციის თანახმად გააკეთა ძალიან მკაფიო გზავნილი — გეოპოლიტიკური  რეალობის  გათვალისწინებით, ალიანსი მაქსიმალურად დაეხმარება პარტნიორ სახელმწიფოებს. სამიტი პოლიტიკურ ნაწილში გვიქმნის იმის  საფუძველს, რომ პროაქტიულად  ევროატლანიკური პერსპექტივის მიმართულებით გადავდგათ მთელი რიგი ნაბიჯები. გარდა ამისა, ეს სამიტი ჩვენთვის  იყო  ნიშანდობლივი არა მხოლოდ  სტრატეგიული კონცეფციის მიღების თვალსაზრისით, არამედ იმ ფაქტით რომ — NATO გაფართოვდა.

შვედეთმა და ფინეთმა  ალიანსისგან მიიღო მიწვევა წევრობაზე (დღეს 5 ივლისს ისინი ხელს მოაწერენ ოფიციალური გაწევრიანების დოკუმენტს. რედ.), ჩვენ ისიც ვიცით, რომ არც  შვედეთს და არც ფინეთს გაწევრიანების სამოქმედო გეგმა არ ჰქონიათ. ამ პრეცედენტის შექმნა ნიშნავს იმას, რომ სახელმწიფო  შეიძლება  გახდეს  ალიანსის წევრი გაწევრიანების სამოქმედო  გეგმის გარეშეც. საქართველოსთვის ეს კი, არის  კარგი პრეცედენტი, რადგან  ჩვენი NATO- ელი  პარტნიორები  მათ  შორის სკეპტიკოსები დავარწმუნოთ იმაში, რომ საქართველოს  ინტეგრაციის  პროცესი დაჩქარდეს  და გაწევრიანების სამოქმედო  გეგმა  ამ პროცესში  საჭირო  არ არის. მეტიც, საქართველოს პრაქტიკულად ყველა  ინსტრუმენტი გააჩნია წევრობისთვის  — ნატო-საქართველოს კომისია,  განახლებული არსებითი პაკეტი, ასევე წლიური პროგრამა და სხვა, რაც ჩვენ შესაძლებლობას რომ ინტეგრაციის რიგი კრიტერიუმები დავაკმაყოფილოთ. ამიტომ სწორედ ეს გადაწყვეტილება, მე ვფიქრობ,  ჩვენი საგარეო პოლიტიკური მიზნების მისაღწევად უნდა გამოვიყენოთ“, - აღნიშნა ხათუნა  ბურკაძემ.

თაკო კვაჭანტირაძე