ვინ არის ჩამოშლილი მგონი საზოგადოებისთვის აბსოლუტურად ნათელია. მიხეილ სააკაშვილი არის საუკეთესო ადგილზე რუსთავში, სადაც მოუწევს პასუხისგება იმ კონკრეტულ ჩადენილ დანაშუალებზე, რომელიც მან ქვეყნის და ხალხის წინაშე ჩაიდინა - ამის შესახებ ჟურნალისტებს „ქართული ოცნების“ თბილისის მერობის კანდიდატმა კახა კალაძემ განუცხადა.
მისივე თქმით, დაკავების სპეცოპერაცია იდეალურად იყო შესრულებული.
„დაელოდეთ ამ პროცესებს, საკმაოდ საინტერესო მოვლენებია. ეს იყო სპეცოპერაცია, შესაბამისმა სამსახურებმა ზუსტად და უკეთ იციან თუ როდის, როგორ უნდა მომხდარიყო აყვანის ოპერაცია. იდეალურად იყო შესრულებული. მადლობა შსს-ს და უშიშროების სამსახურის თითოეულ თანამშრომელს, ძალიან მნიშვნელოვანი სპეცოპერაცია ჩატარდა მშვიდობიანად, წყნარად ყოველგვარი პრობლემის გარეშე და ყველა ადამიანს მიუჩინეს საკუთარი ადგილი.
რაც შეეხება იმას ვინ რა იცოდა, შესაძლოა, პარტიის გენერალურმა მდივანმა ბევრი რამ ვიცოდე, მაგრამ არის კონკრეტული სპეცოპერაციები, რომელთან დაკავშირებითაც არანაირი უფლება არ მაქვს საუბრის გაჟღერების. შესაძლოა, რაღაცები არც ვიცოდე და არც უნდა ვიცოდე. ყველაზე მთავარი არის ის, რომ „ნაციონალური მოძრაობის“ ლიდერი, კრიმინალი და ბრალდებული მიხეილ სააკაშვილი ბრძანდება რუსთავის საპყრობილეში, სადაც მოუწევს სასჯელის მოხდა“, - განაცხადა კალაძემ და დასძინა, რომ გუშინდელი მოვლენების შემდეგ, „ნაციონალური მოძრაობა“ და მისი სატელიტები ჩამოშლილი არიან. თუმცა, კალაძე ამბობს, რომ ამან არ უნდა მოადუნოს სახელისუფლებო გუნდი და საზოგადოება. მან ამომრჩევლებს აქტიურობისკენ მოუწოდა.
„დღეს არის მნიშვნელოვანი დღე თითოეული ჩვენგანისთვის, საქართველოს თითოეული მოქალაქისთვის, თითოეული თბილისელისთვის. დღეს თბილისელები მიიღებენ გადაწყვეტილებას იმასთან დაკავშირებით, თუ როგორ ქალაქში სურთ ცხოვრება. ორი თვის მანძილზე, ჩვენ თბილისელებს ვაცნობდით ჩვენს ხედვას და გეგმებს იმის შესახებ, თუ რა გაკეთდება თბილისში მომდევნო 4 წლის განმავლობაში, როგორ გალამაზდება ჩვენი ქალაქი, როგორ შევიტანთ მეტ სიცოცხლეს თბილისის ყველა უბანში და ზოგადად, როგორ წარმოგვიდგენია დედაქალაქი მომდევნო 4 წლის განმავლობაში ყველა უბნის მიხედვით, ყველა ქუჩის მიხედვით, თუ რა პროექტები იქნება განხორცილებული.
დარწმუნებული ვართ, ჩვენს მიერ 4 წლის მანძილზე გაკეთებული და შემდეგი 4 წლის მანძილზე გასაკეთებელი საქმეები გახდება თბილისში ჩვენი გუნდის გამარჯვების ძალიან მყარი საფუძველი. ამასთან ერთად, კიდევ ერთხელ შეგახსენებთ, რომ ამ არჩევნებს აქვს სერიოზული პოლიტიკური დატვირთვა.
გვესმის, რომ გუშინდელი მოვლენების შემდეგ, „ნაციონალური მოძრაობა“ და მისი სატელიტები ჩამოშლილი არიან. თუმცა, ამან არ უნდა მოგვცეს მოდუნების საშუალება. დღეს, ჩვენი მაქსიმალური აქტიურობით შეგვიძლია საბოლოოდ დავასრულოთ პოლარიზაცია, სიძულვილი და აგრესია ქართულ პოლიტიკასა და საზოგადოებაში. 150 ათასზე მეტმა თბილისელმა უკვე გააკეთა არჩევანი. მადლობას ვუხდი თითოეულ მათგანს მაღალი სამოქალაქო პასუხისმგებლობის გამოვლენისთვის.
ამასთან, საჭიროა კიდევ უფრო მეტი აქტიურობა, რათა არჩევნები დასრულდეს იმ შედეგით, რომელიც ყველაზე მეტად სჭირდება ჩვენი ქვეყნისა და დედაქალაქის განვითარებას და აღმშენებლობას“,-განაცხადა კალაძემ.