მოსკოვის ვნუკოვოს აეროპორტის განრიგში  მოსკოვსა და თბილისს შორის პირდაპირი რეისი გამოჩნდა. ამის შესახებ „ეხო კავკაზა“ წერს.  ინფორმაცია გავრცელდა რამდენიმე ტელეგრამარხზეც.

აეროპორტის ვებგვერდი იტყობინებოდა, რომ 2023 წლის 18 აპრილიდან 28 ოქტომბრის ჩათვლით Georgian Airways პირდაპირ ფრენებს განახორციელებდა ყოველდღიურად, მოსკოვის დროით 11:45 საათზე.

„ეხო კავკაზა“ დაუკავშირდა „ვნუკოვოს“ საინფორმაციო სამსახურს, სადაც დაადასტურეს, რომ ეს იყო პირდაპირი რეისი და არა ერევნის გავლით.

პირდაპირი ფრენების შესახებ ინფორმაცია Georgian Airways-ის ვებგვერდზე არ არის განთავსებული. ავიაკომპანიის წარმომადგენლები გავრცელებულ ინფორმაციას არ ადასტურებენ.

თავდაპირველად ინფორმაცია რუსეთსა და საქართველოს შორის პირდაპირი ფრენების შესაძლო აღდგენის შესახებ წყაროებზე დაყრდნობით ბლოგერმა ნიკოლაი ლევშიცმა გაავრცელა. მისივე თქმით, რეისი თბილისის მიმართულებით განრიგიდან გამოჩენიდან 10 წუთის შემდეგ  გაქრა და ვერც ქალაქი თბილისის შერჩევაა შესაძლებელი მიმართულებების სიიდან.

18 იანვარს რუსეთის საგარეო საქმეთა მინისტრმა სერგეი ლავროვმა განაცხადა, რომ  საქართველოსთან პირდაპირი ფრენების სწრაფად აღდგენის იმედი აქვს. ინიციატივას მხარი მმართველმა პარტიამ „ქართულმა ოცნებამ“ დაუჭირა, პრეზიდენტი სალომე ზურაბიშვილი კი წინააღმდეგ გამოვიდა.

ევროკავშირმა და აშშ-მა გააფრთხილეს საქართველო რუსეთთან ფრენების აღდგენის შემთხვევაში შესაძლო სანქციების შესახებ.

მარტში სახელმწიფო დუმის დსთ-ს, ევრაზიული ინტეგრაციისა და თანამემამულეებთან ურთიერთობის კომიტეტის ხელმძღვანელმა ლეონიდ კალაშნიკოვმა განაცხადა, რომ რუსეთი და საქართველო პირდაპირი ფრენების აღდგენისა და ვიზების გაუქმების ზღვარზე არიან.

რუსეთმა საქართველოსთან ფრენები 2019 წლის 8 ივლისს შეწყვიტა სახელმწიფო სათათბიროს დეპუტატის სერგეი გავრილოვის ინციდენტის შემდეგ. რუსეთის პრეზიდენტის ბრძანებულებით, რუსულ ავიაკომპანიებს დროებით ეკრძალებათ საქართველოში საჰაერო გადაზიდვების განხორციელება. რუსეთის ფედერაციის ტრანსპორტის სამინისტრომ, თავის მხრივ, მიიღო გადაწყვეტილება ქართული ავიახაზების ფრენების შეჩერების შესახებ.