ანტიკორუფციულ ბიუროში ვქმნით საკონსულტაციო საბჭოს, სადაც იქნებიან როგორც აკადემიური წრის, ისე ბიზნესისა და არასამთავრობო ორგანიზაციების წარმომადგენლები, - ამის შესახებ ანტიკორუფციული ბიუროს უფროსმა რაჟდენ კუპრაშვილმა ანტიკორუფციული ბიუროს პრეზენტაციაზე სიტყვით გამოსვლისას განაცხადა.
„შემდგომი მიმართულება ანტიკორუფციულ ბიუროს ექნება საერთაშორისო მიმართულება. ჩვენთვის ძალიან მნიშვნელოვანია საერთაშორისო ორგანიზაციებთან მუდმივი კოორდინაცია, ინფორმაციების მიმოცვლა, ამისთვის შევქმენით ცალკე დეპარტამენტი და მუდმივად გვექნება მათთან კომუნიკაცია, ინფორმაციების მიმოცვლა, რაც კიდევ უფრო ეფექტურს გახდის ჩვენი ბიუროს სამუშაოებს. ასევე შევქმენით ანტიკორუფციული ბიუროს სასწავლო ცენტრი, რომელიც არა მხოლოდ ბიუროს თანამშრომლების გადამზადებას მოემსახურება, ის სხვადასხვა უწყებებში საჯარო მოხელეებს გადაამზადებს მნიშვნელოვან მიმართულებებში და ამავდროულად იზრუნებს ცნობიერების ამაღლების მიმართულებით საზოგადოებაში, ჩვენ ძალიან მნიშვნელოვან კამპანიებს განვახორციელებთ.
მნიშვნელოვანი იქნება ადგილობრივ არასამთავრობო ორგანიზაციებთან თანამშრომლობაც, აქ ჩვენ უკვე დაგეგმილი გვაქვს შეხვედრები, შევხვდებით, გავივლით სხვადასხვა საკითხებს და ვიმედოვნებ, მათთან კონსტრუქციულ რეჟიმში თანამშრომლობის საშუალება მოგვეცემა. ასევე აკადემიური წრის წარმომადგენლებთან თანამშრომლობა არის ძალიან მნიშვნელოვანი. ჩვენ სპეციალურად ვქმნით ანტიკორუფციულ ბიუროში საკონსულტაციო საბჭოს, სადაც როგორც აკადემიური წრის, ისე ბიზნესისა და არასამთავრობო ორგანიზაციების წარმომადგენლები იქნებიან კონკრეტული მიმართულებებით და მათ ეს პლატფორმა დაეხმარებათ იმისთვის, რომ ახლოს გავიცნოთ ის მიმართულებები და რეფორმები, რაც დადგენილი იქნება ანტიკორუფციული ბიუროს მიერ,“ - აღნიშნა ანტიკორუფციული ბიუროს უფროსმა.
რაჟდენ კუპრავილის თქმით, ბიურის ძირითადი მიმართულება დეკლარაციების წარმოდგენა და მისი მონიტორინგია და ამ მიმართულებით, საქართველოს მოდელი ერთ-ერთ კარგ მოდელად არის შეფასებული ყველა კვლევაში.
„არ რჩება თანამდებობის პირის, ასე ვთქვათ, დეკლარაცია, რომ არ ხდებოდეს მისი მონიტორინგი და შემოწმება. ამ მიმართულებითაც ანტიკორუფციულ ბიუროს ექნება სიახლე. ჩვენ დაახლოებით 5 კადრი დავამატეთ მონიტორინგის მიმართულებით, ეს ძალიან მნიშვნელოვანია, თუმცა ვსწავლობთ იმ გამოწვევებს, რა გამოწვევებიც გვაქვს დღეს და მივაქცევთ ყურადღებას მომავალში იმ განსაკუთრებული პერსონალური ინფორმაციების დაცვას, რაც არასრუწლოვნებთან არის დაკავშირებული. ეს ძალიან მნიშვნელოვანი ნაწილია,“ - განაცხადა რაჟდენ კუპრავილმა.