საქართველოს პრეზიდენტი სალომე ზურაბიშვილი საქართველოს მოსახლეობის იმ ნაწილს ულოცავს შობას, რომელიც დღესასწაულს 25 დეკემბერს ზეიმობს.

„ვულოცავ ყველას, ვინც დღეს შობის დღესასწაულს ზეიმობს!

საქართველოში კონფესიათა სიმრავლე და მათი მშვიდობიანი თანაცხოვრების მრავალსაუკუნოვანი ტრადიცია საამაყოა ჩვენი ქვეყნისათვის. ვუერთდები საქართველოში არსებული სხვადასხვა ქრისტიანული ეკლესიის მრევლის, ჩვენი საზოგადოების მნიშვნელოვანი, ღირსეული ნაწილის სიხარულსა და საზეიმო განწყობას, რომელიც მუდამ თან ახლავს ქრისტესშობის დღესასწაულს. ვუსურვებ ჯანმრთელობას, სიხარულსა და კეთილდღეობას!“, - ნათქვამია საქართველოს პრეზიდენტის მიერ გავრცელებულ განცხადებაში.

25 დეკემბერს შობას კათოლიკე ეკლესია და პროტესტანტული ეკლესიების უმრავლესობა ზეიმობს.

25 დეკემბერს ქრისტესშობას ასევე ზეიმობენ კონსტანტინოპოლის, ალექსანდრიის, ანტიოქიის, საბერძნეთის, კვიპროსის, რუმინეთის, ბულგარეთის, ალბანეთის, ჩეხეთ-სლოვაკეთისა, ამერიკის ავტოკეფალიური მართლმადიდებელი ეკლესიები.

25 დეკემბერს შობას აღნიშნავენ: უკრაინაში, ბელარუსში, ერიტრეაში, ლიბანსა და მოლდოვაში.

რუსეთის მართლმადიდებელი ეკლესია, საქართველოს მსგავსად შობას 7 იანვარს აღნიშნავს.