ქუთაისის 124-ე უბანზე წინასწარ შევსებული და ხელმოწერილი მერის არჩევნების შემაჯამებელი ოქმი ვრცელდება. ამის შესახებ ისაუბრა პარტია „ნაციონალური მოძრაობის“ ქუთაისი მერობის კანდიდატმა ხატია დეკანოიძემაც.

შემაჯამებელ ოქმში, რომელიც ხმის მიცემის პროცედურის დასრულების შემდეგ დგება, უკვე აღნიშნულია მისული ამომრჩევლების რაოდენობა, ასევე საარჩევნო კომისიის წევრების ხელმოწერებიც.

„წინასწარ ოქმის შედგენა არის მნიშვნელოვანი პროცედურული დარღვევა, აღნიშნული პროცედურა უნდა მოხდეს ხმების დათვლის შემდგომ, რაც დეტალურადაა აღწერილი საარჩევნო კოდექსის 71-ე მუხლის 1 ნაწილში, “- მითითებულია სამოქალაქო საარჩევნო კომისიის ვებგვერდზე, სადაც გამოქვეყნდა ოქმის ფოტო.

„პუბლიკა“ დაუკავშირდა ქუთაისის 124-ე უბნის კომისიის მდივანს, რომელმაც არ უარყო ამ ოქმის არსებობა, უბრალოდ თქვა, რომ მხოლოდ ის ნაწილია შევსებული რისი შევსებაც წინასწარ შეიძლება. მან გავითიშა ტელეფონი და დანარჩენ კითხვებს არ უპასუხა. ასევე არ პასუხობს „პუბლიკას“ ზარებს კომისიის თავმჯდომარე.

ცოტა ხნის წინ ამ დაღვევის შესახებ კომენტარი გააკეთეს ცესკოსშიც, სადაც ამბობენ რომ ოქმი განადგურდება და კომისიას გადაეცემა ახალი შემაჯამებელი ოქმის ნიმუში.