საქართველოს სავიზიტო ბარათი, საბჭოთა კავშირის რივიერა - წყალტუბო ისევ ახალი სიცოცხლის მოლოდინშია. კურორტის გაცოცხლება 30 წლის განმავლობაში ვერც ერთმა მთავრობამ ვერ შეძლო. წყალტუბოს განვითარება ვერც ქვეყნის ყველაზე მდიდარმა ადამიანმა, ბიძინა ივანიშვილმა მოახერხა, არდა 2019 წლის ოქტომბერში „ქართული ოცნება — დემოკრატიული საქართველოს“ დამფუძნებელმა „წყალტუბოს აღორძინების“ გეგმას ჩაუყარა საფუძველი. წელიწად-ნახევრის შემდეგ უნიკალურ სამკურნალო, სარეაბილიტაციო და ტურისტული პოტენციალით სავსე წყალტუბოში არაფერი შეცვლილა.
ივანიშვილი ამბობდა, რომ პროექტი პირადი სახსრებით, მაქსიმალურად შემჭიდროვებულ ვადებში უნდა განხორციელებულიყო, მაგრამ ამორტიზებული ინფრასტრუქტურა და განადგურებული, უნიკალური სანატორიუმები წყალტუბოს ყოველდღიურობად რჩება. „ქართული ოცნების“ უკვე ყოფილმა ლიდერმა თქვა ისიც, რომ ქალაქ წყალტუბოში ყველა სასტუმროს, ბალნეოლოგიური სააბაზანოს და ძველი სანატორიუმების შეძენას აპირებდა - საუბარია 22 სანატორიუმ- სასტუმროზე და 9 ბალნეოლოგიურ სააბაზანოზე. თუმცა, გასხვისებული ობიექტების სია არ გვინახავს. არადა, ბიძინა ივანიშვილი ამბობდა, რომ „პროექტის გარანტორი და დამზღვევი თავად იყო“ - რაც არ გაიყიდებოდა, იმ ობიექტებს „ქართული ოცნების“ ყოფილი თავმჯდომარე შეიძენდა. მმართველი გუნდის ყოფილი ლიდერის ამ განცხადების მიუხედავად ბიზნესი წყალტუბოთი არ დაინტერესებულა.
ამ დროის განმავლობაში კურორტის აღორძინებისთვის გადადგმული პირველი ქმედითი ნაბიჯი იყო ის, რომ ქალაქის გენერალური გეგმის კონცეფცია უნდა შემუშავებულიყო. საქართველოს რეგიონული განვითარების და ინფრასტრუქტურის სამინისტროს მიერ გამოცხადებულ კონკურსში, კომპანია „ბაუ დიზაინმა“ გაიმარჯვა. კურორტს გენერალური გეგმის კონცეფცია 90 დღეში უნდა ჰქონოდა, თუმცა პირველი ცვლილება ხელშეკრულებაში 2021 წლის 8 თებერვალს შევიდა, რა დროსაც დოკუმენტის საბოლოო ვერსიის წარმოდგენის თარიღი 90 დღის ნაცვლად 104 დღით 2021 წლის 24 მარტამდე შეიცვალა.
მეორე ცვლილება ხელშეკრულებაში 11 მარტს შევიდა, მომსახურების გაწევის ვადაა ხელშეკრულების გაფორმებიდან 134 კალენდარული დღით, არაუგვიანეს 2021 წლის 23 აპრილამდე განისაზღვრა.
მესამე ცვლილება, ხელშეკრულებაში 12 აპრილს შედის – ვადამ ამჯერად 159 დღით, 2021 წლის 18 მაისამდე გადაიწია.
მეოთხე ცვლილება ხელშეკრულებაში 18 მაისს შევიდა, რომლის მიხედვითაც, მომსახურების გაწევის ვადა ხელშეკრულების გაფორმებიდან 204 დღით განისაზღვრა, არაუგვიანეს 2021 წლის 2 ივლისისა.
მეხუთე, ბოლო ცვლილება ხელშეკრულებაში 2 ივლისს შევიდა, რომლის მიხედვითაც დოკუმენტის საბოლოო ვერსიის წარმოდგენის თარიღი 234 დღით 28 ივლისამდე განისაზღვრა.
როგორც „კომერსანტს“ „ბაუ დიზაინის“ დირექტორმა მიხეილ ბალიაშვილმა განუცხადა, წყალტუბოს გენერალური გეგმის კონცეფციის პროექტი ინფრასტრუქტურის სამინისტროს უკვე ჩააბარა. თუმცა სახელმწიფო შესყიდვების საააგენტოს ვებ-გვერდზე მიღება-ჩაბარების ხელშეკრულება ატვირთული არ არის.
ატვირთულია მხოლოდ ერთი ხელშეკრულება, რომელიც 23 ივნისით თარიღდება. დოკუმენტით ირკვევა, რომ კომპანიამ ხელშეკრულებით განსაზღვრული ნაწილობრივი მომსახურება ჩააბარა, რომელიც გულისხმობს დაზუსტებული გეგმარებითი ერთეულის, განვითარების ხედვის, განვითარების სტრატეგიისა და სიცოცხლისუნარიანობის შეფასებას, ასევე საინვესტიციო ობიექტებისა და ტერიტორიების შესწავლა და განვითარების პარამეტრების დადგენას.
კომერსანტი შეეცადე გაერკვია როდის მიიღებს დოკუმენტი საბოლოო სახეს და როდის დაიწყება საჯარო განხილვები, თუმცა ინფრასტრუქტურის სამინისტროს პრესსამსახურმა მედიაჰოლდინგის ზარებს არ უპასუხა. უპასუხოდ დაგვტოვა საქართველოს რეგიონული განვითარებისა და ინფრასტრუქტურის სივრცითი დაგეგმარების დეპარტამენტის უფროსმაც, რომელიც პროცესს უშუალოდ ხელმძღვანელობს.
ფაქტი ერთია – უდიდესი მიზიდულობის ცენტრი ამ დრომდე ვერ შეიქმნა, მმართველი გუნდის წევრების განცხადებები, განცხადებებად დარჩა, 20 000-მდე ადამიანი წყალტუბოს სასტუმროების და ბიზნესის მომსახურებაში ვერ დასაქმდა. ქართული ბადენ-ბადენის შექმნის პროექტი პრაქტიკულად ჩავარდა.
ბაჩო ადამია