ხელისუფლებას ბოლო შანსი აქვს, აღმოფხვრას ნაპრალი მოსახლეობასთან და აჩვენოს, რომ ის არ არის არადეკლარირებული რუსული ძალა, – ამის შესახებ საქართველოს პრეზიდენტმა, სალომე ზურაბიშვილმა „სიენენის“ ეთერში აისა სოარესთან გადაცემაში განაცხადა.

როგორც სალომე ზურაბიშვილმა აღნიშნა, იმ დროს, როდესაც საქართველო კანდიდატის სტატუსზე გადაწყვეტილების მოლოდინშია და არავითარი საჭიროება არ ყოფილა არასამთავრობო ორგანიზაციების რეგისტრაციის, ამ კანონმდებლობის წარდგენა, რუსული პოლიტიკის ინტერესების გატარებად გამოიყურება.

მისივე თქმით, „როდესაც ხალხის ნების თავისუფლად გამოხატვის ჩახშობა, რომელიც მშვიდობიანად აპროტესტებს და მოდის ერთი მოთხოვნით, გაიწვიონ ეს კანონი და რომელზეც ვენეციის კომისია უახლოეს დღეებში სავარაუდოდ იტყვის, რომ მას არ გააჩნია საკუთარი პოზიცია, ხელისუფლებას უნდა ესმოდეს, ეს მათი ბოლო შანსია აღმოფხვრას ნაპრალი, რომელიც სულ უფრო ღრმავდება. ბოლო შანსი აქვთ აჩვენონ, რომ ისინი არ არიან არადეკლარირებული რუსული ძალა“.

წამყვანის კითხვაზე, რატომ სურს ქვეყანას, რომელსაც ევროპული მისწრაფება აქვს, მიიღოს კანონი რომელიც ანტიდემორკატიულად შეფასდა და რატომ სურს ამ გზით წასვლა, ზურაბიშვილმა აღნიშნა: „ძალიან ნათელია, რომ ქვეყანასა და მოსახლეობას არ სურს ეს გზა. ყოველ ჯერზე, საქართველოს უახლოეს ისტორიასა თუ წარსულში, არჩევანი არსებობდა და საქართველოს მოსახლეობის პასუხი იყო, მათ შორის ძალიან ბევრჯერ ქუჩიდან, რომ ჩვენ გვსურს ევროპა, რომ ევროპაა ჩვენი მომავალი და ღირებულება, ეს ხდება ისევ. წარმოდგენილი კანონმდებლობა, რომელზეც ვთქვი, რომ ვეტოს დავადებ, ყველა იმ პრინციპის საწინააღმდეგოა, რომელსაც იცავს ევროკავშირი. ეს ხდება იმ დროს, როდესაც ჩვენ ველოდებით კანდიდატის სტატუსზე გადაწყვეტილებას, რომელიც საქართველომ რამდენიმე თვის წინ ვერ მიიღო, როდესაც ის მიანიჭეს უკრაინასა და მოლდოვას. საქართველოს მოსახლეობამ იცის, რომ ძალიან მნიშვნელოვან მომენტში ვიმყოფებით მათი მომავლისთვის, იციან, რომ მათი შვილების მომავალი განისაზღვრება იმით, თუ რას მოვიმოქმედებთ უახლოეს მომავალში და ისინი მკაფიოდ ამბობენ, რომ სურთ ევროპა“.

წყარო: https://1tv.ge/