გენერაციული ხელოვნური ინტელექტი 2025 წლისთვის ტექსტების, ფოტოების, ვიდეო და აუდიომასალის - მთლიანი ონლაინ კონტენტის 90%-ს შექმნას შეძლებს. ამის შესახებ განცხადება ცნობილმა საჯარო სპიკერმა ნინა შიკმა Yahoo Finance-თან გააკეთა.

მისი თქმით, OpenAI-ის DALL-E-სა და ChatGPT-ის მიმართ ინტერესის ზრდამ, ხელი შეუწყო ფართო საჯარო დისკუსიას ხელოვნურ ინტელექტსა და მის მზარდ როლზე ჩვენს სამყაროში.

გენერაციული ხელოვნური ინტელექტის სივრცე მომავალ წელს ბევრად უფრო კონკურენტუნარიანი გახდება, განაცხადა შიკმა. ის მოელის, რომ ისეთი კომპანიები, როგორიცაა Google-ის მშობელი Alphabet-ი (GOOG, GOOGL), Microsoft-ი (MSFT) და Apple (AAPL) ამ მიმართულებით სიახლეებს შემოგვთავაზებენ.

„იმ ფონზე, როცა Microsoft-ი OpenAI-ს ინვესტორია და ChatGPT-ი Bing-ში აპირებს ინტეგრირებას, ბევრი კამათი იყო იმის შესახებ - შეუქმნის თუ არა საფრთხეს ChatGPT-ი Google-ის საძიებო სისტემის დომინანტურობას?

შიკმა განაცხადა, რომ ის Google-ისგან კონკურენტუნარიანობას მოელის და არა გაქრობას, რადგან ეჭვი არა ეპარება,  რომ Google-ი საკუთარ გენერაციულ AI ინსტრუმენტებს ავითარებს.

ცნობისათვის, Microsoft-მა უკვე განახორციელა 1 მლრდ დოლარის ინვესტიცია OpenAI-ში. გავრცელებული ინფორმაციით, კომპანია OpenAI-ში კიდევ 10 მლრდ დოლარის ინვესტირებას აპირებს.

მოამზადა მაკა ბიბილაშვილმა