2020 წელს ბილ გეიტსმა Microsoft-ის დირექტორთა საბჭო დატოვა, მაგრამ დროის დაახლოებით 10%-ს მაინც Microsoft-ის ვაშინგტონის შტაბ-ბინაში ატარებს და თანამშრომლებთან მართავს შეხვედრებს. ამ შეხვედრების მთავარი განსახილველი თემებია: ხელოვნური ინტელექტი, როგორ შეუძლია AI-ს სამუშაო პროცესის შეცვლა და როგორ იყენებენ Microsoft-ს საამისოდ.
ბილ გეიტსი Fortune-თან ინტერვიუში აცხადებს, რომ ხელოვნური ინტელექტი 2023 წელს ყველაზე ხშირად განსახილველი თემა იქნება. ის ამბობს, რომ AI ChatGPT-ი ისეთივე მნიშვნელოვანია, როგორც კომპიუტერი და როგორც ინტერნეტი.
2023 წლის იანვრის ბოლოს კორპორაცია Microsoft-მა, ChatGPT ხელოვნური ინტელექტის მქონე ჩატბოტის შემქმნელ OpenAI-თან მრავალწლიანი ხელშეკრულების დადების შესახებ გამოაცხადა. ეს გრძელვადიანი პარტნიორობის მესამე ეტაპია, რომლის დროსაც Microsoft-ი OpenAI-ს, ინოვაციური ტექნოლოგიების განვითარებისთვის, მრავალ მილიარდ დოლარიანი მხარდაჭერით უზრუნველყოფს.
ინვესტიციების პირველი ორი რაუნდი 2019 და 2021 წლებში განხორციელდა. მიმდინარე ეტაპი მიზნად ისახავს თანამშრომლობას სუპერკომპიუტერისა და ხელოვნური ინტელექტის გადაწყვეტილებებზე. Microsoft-ი არ ამხელს ინვესტიციების სავარაუდო ოდენობას, მაგრამ Bloomberg-ის ცნობით თანხა დაახლოებით 10 მლრდ დოლარია.
„OpenAI-სთან პარტნიორობა ერთობლივი სურვილის საფუძველზე დავამყარეთ. გვინდა ხელი შევუწყოთ მოწინავე AI ინსტრუმენტების განვითარებას და მასთან დაკავშირებული ინფრასტრუქტურის დემოკრატიზაციას. ჩვენი პარტნიორობის შემდეგ ეტაპზე დეველოპერებს და ორგანიზაციებს სხვადასხვა ინდუსტრიაში ექნებათ წვდომა Azure-ის საუკეთესო AI ინფრასტრუქტურაზე, მოდელებსა და ხელსაწყოებზე, იმისათვის რომ ხალი აპლიკაციები შექმნან “, - განაცხადა Microsoft-ის თავმჯდომარემ და აღმასრულებელმა დირექტორმა სატია ნადელამ.
როგორც ამბობენ, Microsoft-ი გაზრდის ინვესტიციებს სპეციალიზებული სუპერკომპიუტერული სისტემების შემუშავებასა და დანერგვაში, რათა დააჩქაროს ხელოვნური ინტელექტის კვლევა OpenAI პროექტების მეშვეობით. საერთო ჯამში, გარიგება ხელს შეუწყობს Azure ღრუბლის განვითარებას და, ასევე, კომპლექსური AI მოდელების გასაშვებად, OpenAI-ს დამატებითი სუპერკომპიუტერებით უზრუნველყოფს.