"ყველაფერი იქნება გამოყენებული, ტექნიკური აღჭურვილობა თუ სხვა საჭიროება იმისთვის, რომ სააკაშვილს არ მოაკლდეს არაფერი," - ამის შესახებ პარლამენტის თავმჯდომარე კახა კუჭავამ ჟურნალისტებთან განაცხადა.
მისი თქმით, თუ იქნება კონკრეტული საჭიროება და აღმოჩნდება, რომ საკმარისი არ არის სასჯელაღსრულების დაწესებულების აღჭურვილობა თუ მოვლის ხარისხი, მას სხვაგან გადაიყვანენ, თუმცა ამ ეტაპზე ამის საჭიროება არ დგას.
„გუშინ პრემიერმა თვითონ გააკეთა განმარტება. სიცოცხლის უფლება არის უფლება, რომელზეც თითოეული ჩვენგანი, განსაკუთრებით ხელისუფლება პასუხისმგებელია იზრუნოს. ექიმების კონტროლია საჭირო, შესაბამისი მედიკამენტები თუ სხვა, ყველაფერი იქნება გაკეთებული, იმიტომ კი არა, რომ ადრე რაღაც თანამდებობა ეკავა, არც ერთ ადამიანს არ შეექმნება საფრთხე და ბოლომდე იქნება ზრუნვა ექიმების ჩართულობით. ყველა, ვინც იქ არის, არის თანასწორუფლებიანი, ვინმეს ხომ არ უნდა ჰქონდეს მეტი პრივილეგია, მოპყრობა იქნება ისე, როგორც ყველა სხვასთან. ყველაფერი იქნება გამოყენებული, ტექნიკური აღჭურვილობა თუ სხვა საჭიროება იმისთვის, რომ მას არ მოაკლდეს არაფერი. თუ გაჩნდება საჭიროება, რომელიც აჩვენებს, რომ აუცილებელია კონკრეტული დანადგარი თუ მოვლა და იმ დაწესებულებაში არ ხდება ამის გაკეთება, ეს გადაწყვეტილებაც იქნება მიღებული, მაგრამ ჯერ ამის საჭიროება არ არის. განცხადებები ბევრი მოგვისმენია და ვიცით, როგორ ხდება ხოლმე განცხადებებით სპეკულირება, ტელევიზორიც აქვს, ინტერნეტსაც იყენებს და ყველაფერს, მე ეს ინფორმაცია მაქვს. მე ვიცი, რომ ყველაფერს იყენებს, რისი უფლებაც აქვს,“ - განაცხადა კუჭავამ.
ცნობისთვის, სააკაშვილის უფლებადამცველები მოითხოვენ ჰოსპიტალიზაციის საკითხი უსწრაფესად გადაწყდეს და გამოირიცხოს ციხის საავადმყოფო, რადგან, მათივე შეფასებით, ციხის საავადმყოფო არ აკმაყოფილებს კონსილიუმის მოთხოვნილ სტანდარტებს. მიხეილ სააკაშვილის ადვოკატის, „მთავარი არხის“ გენერალური დირექტორის, ნიკა გვარამიას, თქმით, ყველაზე მაღალი რისკი, რომელიც სააკაშვილს ემუქრება, გულის გაჩერებაა, შესაბამისად ციხის საავადმყოფოში კარდიოლოგიური სერვისის მეორე დონე უნდა არსებობდეს. ნიკა გვარამია ეჭვობს, რომ ციხეში სააკაშვილის ლიკვიდაცია იგეგმება. მისი ვერსიით, იგეგმება იმიტირებული ბუნტი ციხის საავადმყოფოში, რომელიც დასრულდება სააკაშვილის ლიკვიდაციით. გვარამია ამტკიცებს, რომ ციხეში უკვე შეყვანილია რამდენიმე სპეცდანიშნულების პატიმარი, რომელიც სააკაშვილის ლიკვიდაციაზე იზრუნებს, თუმცა ეს დაბრალდება აღშფოთებულ ციხის პუბლიკას. პრემიერმა ღარიბაშვილმა გვარამიას ამ ეჭვს ბოდვა უწოდა და დასძინა, რომ ეს ინფორმაცია აბსურდულია. რაც შეეხება სააკაშვილის ჰოსპიტალიზაციას, ირაკლი ღარიბაშვილი ამბობს, რომ პატიმარი სააკაშვილი არ არის პრივილეგირებული. პრემიერი ამბობს, რომ ყველა პატიმარი, რომელიც თავისი გადაწყვეტილებით შიმშილობს, საჭიროების შემთხვევაში, გადაჰყავთ ციხის საავადმყოფოში, სადაც ყველა საჭირო პირობაა შექმნილი და ეს გადაწყვეტილება სააკაშვილთან დაკავშირებით არ გადაიხედება.
საქართველოს ყოფილი პრეზიდენტი, პატიმარი, მიხეილ სააკაშვილი შიმშილობს. მას საპატიმროში ხშირად სტუმრობს პირადი ექიმი ნიკოლოზ ყიფშიძე. მისი თქმით, სააკაშვილი მორალურად თავს კარგად გრძნობს, მაგრამ დღითი დღე უფრო და უფრო უჭირს სიარული, აქვს სისუსტე და სახეზე უფერულობა. საქართველოს პრემიერ-მინისტრი ღარიბაშვილი დაჟინებით ამტკიცებს, რომ სააკაშვილი პრივილეგირებული პატიმარი არასდროს იქნება. კითხვას, რამდენად განიხილება ოცნებაში სააკაშვილის გათავისუფლება, ღარიბაშვილი თავდაჯერებული პასუხობს: „გამორიცხულია! სააკაშვილი მინიმუმ 6 წელი იჯდება ციხეში!“
საქართველოს ყოფილი პრეზიდენტი მიხეილ სააკაშვილი 1 ოქტომბერს დააკავეს. ის რუსთავის მე-12 პენიტენციურ დაწესებულებაშია მოთავსებული. საქართველოს მესამე პრეზიდენტი ციხეში შიმშილობს და უკრაინის კონსულთან შეხვედრას ითხოვს. ის ციხიდან წერილებს რეგულარულად ავრცელებს. ექსპრეზიდენტი მიხეილ სააკაშვილი, რომელიც ამჟამად უკრაინის მოქალაქეა, ქართული ოცნების ხელისუფლების მიერ იძებნებოდა. მას ქართული სასამართლოს მიერ დაუსწრებლად აქვს მისჯილი პატიმრობა სანდრო გირგვლიანის გარდაცვალების და პარლამენტის ყოფილი დეპუტატის, ვალერი გელაშვილის ცემის საქმეებზე. 2018 წელს, ორივე საქმეზე სააკაშვილი დამნაშავედ ცნეს სამსახურებრივი უფლებამოსილების გადამეტებასა და ბოროტად გამოყენებაში. ვალერი გელაშვილის ცემის საქმეზე მიესაჯა 6 წლით, ხოლო სანდრო გირგვლიანის გარდაცვალების საქმეზე - 3 წლით. მიხეილ სააკაშვილის წინააღმდეგ აღძრულია სისხლის სამართლის კიდევ რამდენიმე საქმე. მესამე პრეზიდენტს ბრალად ედება 7 ნოემბერს მშვიდობიანი დემონსტრაციის დარბევა, „ტელეიმედში” შეჭრის სანქცირება და ბადრი პატარკაციშვილის ქონების უკანონოდ დაუფლება. ქართული მართლმსაჯულება მას ასევე სახელმწიფო დაცვის სპეციალური სამსახურის კუთვნილი თითქმის 9 მილიონი ლარის გაფლანგვაშიც ადანაშაულებს.
კახა კუჭავა
