საქართველოს ყველაზე მდიდარი ოლიგარქის მიერ სახელმწიფოს მითვისების ფაქტი, კორუმპირებული ჩინოვნიკების დაუსჯელობა, საიდუმლო ბიზნესები რუსეთში და საქართველოს ეკონომიკის მზარდი დამოკიდებულება რუსეთზე, - ეს მიზეზებია დასახელებული საქართველოში არსებული კლეპტოკრატიასა და კორუფციის გამომწვევ მოვლენებად, USAID- ის კორუფციასთან ბრძოლის სამუშაო ჯგუფის ავტორობით გამოქვეყნებულ დეკლეპტიფიკაციის სახელმძღვანელო დოკუმენტში, რომელიც საერთაშორისო გამჭვირვალობა საქართველოს კვლევებზე დაყრდნობით გაკეთდა.

დეკლეპტიფიკაციის სახელმძღვანელო დოკუმენტში წერია, რომ 2004-2012 წლებში, საქართველომ გაატარა მნიშვნელოვანი რეფორმები, მათ შორის საჯარო სექტორის, პოლიციისა და სხვა ინსტიტუტების მიმართულებით, რამაც მნიშვნელოვნად შეამცირა ქვეყანაში კორუფციის და კლეპტოკრატიის დონე. საქართველო ასევე დასახელებულია იმ 14 ქვეყანას შორის, რომელმაც USAID-ის დახმარებით, 2004-2012 წლებში განხორციელებული რეფორმებით მაგალითი მისცეს სხვა ქვეყნებს და შეძლებს შესაძლებლობების ფანჯრის გამოყენება, თუმცა შემდეგ ვითარება შეიცვალა.

„კრემლის ყველაზე გავრცელებული მეთოდი სხვა ქვეყნების რეფორმების ფანჯრების დახურვის არის ფარული ოპოზიციური პოლიტიკური პარტიების დაფინანსება. რუსეთის ფედერაციის მიერ სხვა ქვეყნების არჩევნებში ჩარევის 100-ზე მეტი ფაქტია გასული ათწლეულის განმავლობაში. მაგალითად, უკრაინის ნარინჯისფერი რევოლუცია და საქართველოს ვარდების რევოლუცია დასრულდა, როდესაც რუსეთის მიერ მხარდაჭერილი ოლიგარქები აფინანსებდნენ პრორუს კანდიდატებს, რომლებიც გახდნენ პრეზიდენტები და ხელახლა შეცვალეს ორი ქვეყანა“, — აღნიშნულია დოკუმენტში.

დეკლეპტიფიკაციის სახელმძღვანელოში ძირითადად საუბარია უკრაინის და ასევე მოლდოვას მაგალითებზე, სადაც ოლიგარქების კრიმინალურ სამყაროსთან კავშირზე და მათ მიერ მედიის, ტრანსპორტის სექტორის და სხვა მნიშვნელოვანი სფეროების მონოპოლისტურ ფლობაზეა ხაზი გასმული. ასევე აღნიშნულია, რომ ოლიგარქები ძირითად შემთხვევაში თავს აფარებენ ოფშორებს.