უკრაინის პრეზიდენტმა ვოლოდიმირ ზელენსკიმ ვიდეომიმართვა გაავრცელა და განაცხადა, რომ მომავალი კვირა უკრაინისთვის ისტორიულია, რადგან ევროკავშირმა უკრაინისთვის წევრობის კანდიდატის სტატუსის მინიჭებასთან დაკავშირებით, საბოლოო გადაწყვეტილება უნდა მიიღოს.
„ისტორიული, ერთ-ერთი ყველაზე მნიშვნელოვანი კვირა იწყება, 1991 წლის შემდეგ. ჩვენ მოვისმენთ პასუხს ევროკავშირისგან უკრაინის კანდიდატის სტატუსთან დაკავშირებით. ასეთ კვირაში მტრის გააქტიურებას უნდა ველოდოთ, რომელიც იქნება განზრახ - საჩვენებლად და მიმართული არამხოლოდ უკრაინის, არამედ ევროპის წინააღმდეგაც. მადლობა ყველას, ვისი ძალაც დღეს, ჩვენი ხვალინდელი გამარჯვების მიზეზია“, — თქვა ვოლოდიმირ ზელენსკიმ „ფეისბუქზე“ გავრცელებულ ვიდეომიმართვაში.
17 ივნისს გახდა ცნობილი ევროკომისიის რეკომენდაცია, რომელიც უკრაინისთვის ევროკავშირისი წევრობის კანდიდატის სტატუსი მინიჭებას გულისხმობს. ამავე დროს, უკრაინამ უნდა განამტკიცოს სასამართლო სისტემა, უნდა ჩამოყალიბდეს ანტიკორუფციული ინსტიტუტები. ამასთან, უკრაინამ ვენეციის კომისიის რეკომენდაციების 80% დააკმაყოფილა, დარჩენილია ეთნიკური უმცირესობების კანონი.
რაც ეხება საქართველოს, შეგახსენებთ, რომ ევროკომისიის დასკვნით, საქართველომ უნდა მიიღოს ევროკავშირში გაწევრიანების პერსპექტივა. თუმცა, უკრაინისა და მოლდოვისგან განსხვავებით, კანდიდატის სტატუსისთვის, 12 მოთხოვნა უნდა შეასრულოს.
საბოლოო გადაწყვეტილებას ევროკავშირის წევრი სახელმწიფოების ლიდერთა საბჭო მიიღებს ბრიუსელში, 23-24 ივნისს დანიშნულ სამიტზე.