ზემო ლარსის საკონტროლო-გამშვებ პუნქტთან რუსი სამხედროები ჯავშანტრანსპორტიორით გამოჩნდნენ. აღნიშნულის შესახებ ინფორმაციას და ფოტოს „ჯემნიუსი“ ტელეგრამ არხის საშუალებით ავრცელებს.

როგორც სააგენტო წერს, „საქართველოს საზღვართან, რუსეთის მხარეს, ოკუპანტები ბლოკ-პოსტს გამართავენ და ყველას, ვისაც საქართველოში გადასვლის სურვილი აქვს, საბუთებს შეუმოწმებენ.

p.s. რუსეთი აღარ უშვებს ქვეყნიდან სამობილიზაციო ასაკის მოქალაქეებს“.

„ჯემნიუსი რუსეთის ფედერაციის უსაფრთხოების ფედერალურ სამსახურზე დაყრდნობით წერს, რომ ჯავშანტრანსპორტიორი ზემო ლარსის სასაზღვრო გამშვებ პუნქტში იმ შემთხვევისთვის გაიგზავნა, თუ რიგში მდგომი ხალხი გადაწყვეტს საზღვრის გარღვევას.

„ეს არის, უხეშად რომ ვთქვათ, რეზერვი იმ შემთხვევისთვის, თუ იქ მდგომი ხალხი საგუშაგოს გარღვევას გადაწყვეტს

აღსანიშნავია, რომ დღეს მედია ინტენსიურად ავრცელებდა ინფორმაციას, რომ მობილიზაციას დაქვემდებარებულ რუსეთის მოქალაქეებს ამიერიდან საზღვრის გადასაკვეთად დამატებითი დოკუმენტაციის წარმოდგენა მოუწევდათ. როგორც „რუსთავი 2“ იტყობინება, ამ თემაზე განმარტებები მედიასთან როსტოვის ოლქის სამხედრო კომისარმა გააკეთა. ინფორმაცია, რომ რუსეთის ხელისუფლება კონკრეტული კატეგორიის საკუთარ მოქალაქეებს მალე ქვეყნიდან გასვლას აუკრძალავს, მედიაში რამდენიმე დღის წინ გაჩნდა. დამოუკიდებელი მედიასაშუალებები საზღვრის ჩაკეტვის სავარაუდო თარიღებსაც - 26, ან 30 სექტემბერს ასახელებენ.

რუსული ინტერნეტგამოცემები წერენ, რომ ქვეყნიდან გასვლის აკრძალვის საკითხს მიმდინარე კვირის დასაწყისში რუსეთის პრეზიდენტი, მთავრობის და დუმის წარმომადგენლები განიხილავენ.

რუსეთის ფედერაციის ფარგლებს გარეთ გამგზავრების მიზნით, აუცილებელია აიღოთ დადგენილი ფორმის მოწმობა სამხედრო აღრიცხვისა და გაწვევის ოფისიდან. ჩვენ არ ვკრძალავთ სუბიექტის ტერიტორიაზე გადაადგილებას, მაგრამ რუსეთის ფედერაციის გარეთ გამგზავრებისთვის საჭიროა აიღოთ ცნობა, - განაცხადა როსტოვის ოლქის სამხედრო კომისარმა იგორ ეგოროვიმ.