ზუგდიდის 45-წევრიან საკრებულოს უმრავლესობით სავარაუდოდ, „ნაციონალური მოძრაობა“ დააკომპლექტებს.
ცესკოს წინასწარი მონაცემების მიხედვით, „ნაციონალურმა მოძრაობამ“ ზუგდიდში 14 მანდატი პროპორციული წესით აიღო, ხოლო 15 მაჟორიტარული ოლქიდან საკრებულოში 9 მაჟორიტარი შეიყვანა. ჯამში, წინასწარი მონაცემებით, ზუგდიდის საკრებულოში „ნაციონალურ მოძრაობას“ 23 მანდატი აქვს მიღებული.
რაც შეეხება „ქართული ოცნების“ შედეგებს, პარტიამ ზუგდიდში 13 მანდატი პროპორციული წესით აიღო და 5 მაჟორიტარული ოლქი მოიგო. შესაბამისად, წინასწარი მონაცემებით, „ქართული ოცნების“ მანდატები ზუგდიდში 18-ს შეადგენს.
ამასთან, 3 დეპუტატით ზუგდიდის საკრებულოში გახარიას პარტია შედის.
აღსანიშნავია, რომ ზუგდიდში ერთ მაჟორიტარულ ოლქში მეორე ტური გაიმართება, რომელშიც მონაწილეობას „ნაციონალური მოძრაობისა“ და „ქართული ოცნების“ კანდიდატები მიიღებენ.
იგივე მდგომარეობაა ბათუმშიც. ბათუმის 35-წევრიან საკრებულოში მანდატების უმრავლესობა შესაძლოა, ოპოზიციამ მოიპოვოს. ცესკოს მიერ გამოქვეყნებული წინასწარი მონაცემების მიხედვით, „ქართულმა ოცნებამ“ ბათუმის საკრებულოში 16 მანდატი მოიპოვა, რომელთაგან 12 პროპორციული წესით მიიღო, ოთხ დეპუტატს კი, მაჟორიტარული ოლქებიდან შეიყვანს. წინასწარი მონაცემებით, 15 მანდატი აქვს „ნაციონალურ მოძრაობას“, რომელთა კანდიდატებმაც სამ მაჟორიტარულ ოლქში გაიმარჯვა. 12 „ნაციონალი“ დეპუტატი საკრებულოში პროპორციული სიით შევა. ბათუმის საკრებულოში სამი წევრი გიორგი გახარიას პარტიას ეყოლება და ერთი დეპუტატით პარტია „ლელო“ იქნება წარმოდგენილი.
„ქართული ოცნება“ ქუთაისის საკრებულოში ოპოზიციასთან შედარებით, სავარაუდოდ, მხოლოდ ერთი წევრის უპირატესობით იქნება წარმოდგენილი. ცესკოს წინასწარი შედეგების მიხედვით, ქუთაისის საკრებულოში „ქართულ ოცნებას“ 18 მანდატი ექნება, მათგან 13 წევრს პარტიული სიიდან შეიყვანს, ხოლო 5 დეპუტატი მაჟორიტარული ოლქებიდან არის არჩეული. რაც შეეხება დანარჩენ 17 მანდატს, ის სავარაუდოდ, შემდეგნაირად განაწილდება: „ნაციონალური მოძრაობა“ – 14 მანდატი (12 პარტიული სიით, 2 მაჟორიტარი),“გიორგი გახარია - საქართველოსთვის - 2 მანდატი, გიორგი ვაშაძის პარტია - 1 მანდატი.
ქალაქ რუსთავის საკრებულოში „ქართული ოცნება“ და „ნაციონალური მოძრაობა“, შესაძლოა, თანაბარი რაოდენობით იყოს წარმოდგენილი. ცესკოს მიერ გამოქვეყნებული წინასწარი მონაცემების მიხედვით, რუსთავში ყველაზე მეტი - 16 მანდატი ნაციონალურმა მოძრაობამ (13 - პროპორციული და 3 - მაჟორიტარული წესით) მიიღო. „ქართულ ოცნებას“ მიღებული აქვს 15 მანდატი (12 - პროპორციული და 3 - მაჟორიტარული წესით). იმავდროულად, „ქართული ოცნების“ მიერ წარდგენილ მაჟორიტარობის კანდიდატს რუსთავის #6 მაჟორიტარულ ოლქში არჩევნების მეორე ტური ექნება მოსაგები, სადაც კონკურენტი გიორგი გახარიას პარტიის მაჟორიტარობის კანდიდატია. წინასწარი მონაცემებით, რუსთავის საკრებულოში სამი მანდატი პროპორციული წესით გახარიას პარტიას აქვს მიღებული.
წყარო: ინტერპრესნიუსი