ჯანდაცვის მინისტრად პრემიერ-მინისტრმა ზურაბ აზარაშვილის კანდიდატურა წარადგინა.
ზურაბ აზარაშვილი ამ დრომდე თავდაცვის მინისტრის მოადგილის თანამდებობას იკავებდა.
„ბატონი ზურა გახლავთ ბიზნესადმინისტრირების მაგისტრი. მას ფინანსების მართვის ძალიან დიდი გამოცდილება აქვს. არის ძალიან კარგი, ძლიერი მენეჯერი. ამაში თავად დავრწმუნდით, როცა მე თავდაცვის მინისტრი ვიყავი. ბატონი ზურა მაშინ „დელტას“, ასევე, თბილავიამშენის ხელმძღვანელი იყო. მისი უშუალო ხელმძღვანელობით, არაერთი მნიშვნელოვანი პროექტი განხორციელდა, როგორიცაა საქართველოს ავიაციის აღდგენა, უამრავი სხვა პროექტი, რომელიც უკავშირდება ჩვენი თავდაცვის ძალებისა და სამხედრო მრეწველობის გაძლიერებას და ა.შ. ბატონი ზურა არის უაღრესად წესიერი, განათლებული ადამიანი“, - აღნიშნა ირაკლი ღარიბაშვილმა მთავრობის ადმინისტრაციაში გამართულ ბრიფინგზე.
„მადლობა პრემიერს იმ უდიდესი ნდობითვის, რაც ჩემ მიმართ გამოიჩინა“, - ამის შესახებ ჯანდაცვის ახალმა მინისტრმა ზურაბ აზარაშვილმა მთავრობის ადმინისტრაციაში გამართულ ბრიფინგზე განაცხადა.
როგორც აზარაშვილმა აღნიშნა, მისთვის აღნიშნულ თანამდებობაზე მუშაობა დიდ პასუხისმგებლობას წარმოადგენს.
„ჩემთვის დიდი პასუხისმგებლობაა უდიდესი გამოწვევებით სავსე სამინისტროს მართვა, მაგრამ დარწმუნებული ვარ, რომ პრემიერისა და მთავრობის გუნდის მხარდაჭერით ჩვენ შევძლებთ მოკლევადიან პერიოდში ხელშესახები და მნიშვნელოვანი წარმატების მიღწევას“, - განაცხადა აზარაშვილმა.
ჯანდაცვის მომავალი მინისტრი მანამდე ტერაბანკში, კორ-სტანდარტ ბანკსა და ქართუ ბანკში სხვადასხვა თანამდებობაზე მუშაობდა. იყო თბილავიამშენის გენერალური დირექტორი და დელტას ხელმძღვანელი.
ცნობისთვის, საქართველოს ჯანდაცვის ყოფილმა მინისტრმა ეკა ტიკარაძემ თანამდებობა 9 დეკემბერს დატოვა.
ახალი მინისტრის დანიშვნამდე ეკატერინე ტიკარაძე მოვალეობის შემსრულებლად რჩებოდა.
რაც შეეხება აზარაშვილის ქონებრივ თუ ფინანსურ მდგომარეობას, როგორც მის მიერ 2021 წლის 17 აპრილს შევსებული ქონებრივი დეკლარაციიდან ირკვევა, აზარაშვილის შემოსავალმა „დელტას“ გენერალური დირექტორის პოზიციაზე 2020 წლის 10 მარტიდან 31 დეკემბრის პერიოდში - 58 362 ლარი; „თბილავიამშენის“ გენერალური დირექტორის პოსტზე 2020 წლის 24 აპრილიდან 31 დეკემბრის პერიოდში 46 199 ლარი; „ტერაბანკის“ კომერციული დირექტორის თანამდებობაზე 2020 წლის 1-ლი იანვრიდან 11 მარტის პერიოდში - 174 870 ლარი; „დელტა ინტერნეიშენალის“ წარმომადგენლად მუშაობისას კი 2020 წლის 26 მარტიდან 31 დეკემბრის პერიოდში 4 643 ლარი შეადგინა. მასვე დეკლარაციის შევსების მომენტში თბილისში, საცხოვრებელი სახლი და მიწის ნაკვეთი ჰქონდა, რომელიც 2017 წელს აქვს შეძენილი.
მის ფინანსურ მდგომარეობას რაც შეეხება, დეკლარაციის შევსების მომენტში საბანკო ანგარიშებზე ჯამში, 6 480 ლარი, 24 907 ევრო, 1 860 დოლარი, ნაღდი ფულადი თანხის სახით კი (ავტომობილის რეალიზაციიდან) 15 000 ლარი და 5 000 დოლარი ჰქონდა. მასვე საჩუქრის სახით თავდაცვის სამინისტროსგან მიღებული აქვს 2 500 ლარის ღირებულების იარაღი.
ამასთან, როგორ დეკლარაციიდან ირკვევა ზურაბ აზარაშვილს ჰყავს მეუღლე და 5 შვილი. მისი ერთ-ერთი შვილი ფლობს ბინას თბილისში, რომელიც 2019 წელს მამისგან ჩუქებით აქვს მიღებული. ასევე მის საკუთრებაშია ავტომობილი „ტოიოტა პრადო“, რომელიც 2019 წელს 54 000 ლარად აქვს შეძენილი. ამასთან, აზარაშვილის მეუღლესა და შვილებს დეკლარაციის შევსების დროს საბანკო ანგარიშებზე ჯამში, 3 114 ლარი და 650 დოლარი ჰქონდათ.